Къэлэ гъэпсыкIэ зиIэ псэупIэу Лъэустэнхьаблэ программэ зэфэшъхьафхэм бэрэ ахэлажьэ. Ахэм яшIуагъэкIэ аужырэ илъэс зэкIэлъыкIохэм Iофыбэ щагъэцэкIагъ. Лъэустэн­хьэблэ къэлэ псэупIэм ипащэу КIыкI Аскэр ахэм тащи­гъэгъозагъ.

Муниципальнэ образованиеу «Лъэустэнхьэблэ къэлэ псэупIэм» иадминистрацие федеральнэ проектэу «Бизнес- спринт (Сэ спортыр къыхэсэхы)» зыфиIорэм хэлажьэ. А проектыр зытегъэ­псыхьагъэр спорт гупчэм игъэ­псынкIэ Iэмэ-псымэхэр аIэкIэгъэхьэгъэнхэр ыкIи ахэр зэхэгъэуцогъэнхэр ары. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Проммодульизготовление» зыфиIорэм ащкIэ зэзэгъыныгъэ дишIыгъ, тефагъэр сомэ миллиони 141-м ехъу. Ащ щыщэу федеральнэ бюджетым къикIыгъэр сомэ миллиони 121,5-рэ, республикэ бюджетым — миллион 13,5-рэ, муниципальнэм миллиони 6-м ехъу.
— ЦIыфхэм псэукIэ тэрэз ягъэгъотыгъэныр ыкIи загъэпсэфын амал ятыгъэныр типшъэрылъ шъхьаIэхэм ащыщ. НыбжьыкIэхэр спортым хэщагъэ хъунхэм иамалхэм ащыщ «Сэ спортыр къы­хэсэхы» зыфиIорэ проектыр, — къеIуатэ КIыкI Аскэр.
Къэлэ псэупIэм ипащэ тызэрэщигъэгъозагъэмкIэ, сметэм изэхэгъэуцонкIэ, модульнэ спортзалым ишIынкIэ зэзэ­гъыныгъэ зыдашIыгъэр ООО-у «Сигма Концепт» зыфиIорэр ары. Ащ тефагъэр сомэ миллион мин 296-рэ.
— Физкультурэм зыщыпылъынхэ ыкIи япсауныгъэ зыщагъэпытэн алъэкIыщт чIыпIэ Лъэустэнхьаблэ ищыкIэгъэ дэд. Спорт псэуалъэр лъэхъаным диштэу дгъэпсыщт. Къэралыгъо программэхэм яшIуагъэкIэ ар къыддэхъугъ, — къеIуатэ пащэм.
Федеральнэ проектэу «Къэлэ щыIэкIэ Iэрыфэгъур» зыфиIорэм диштэу 2025-рэ илъэсым щылэ мазэм пшъэдэкIыжьэу ыхьырэмкIэ гъунэпкъэ гъэнэфагъэ зиIэ ООО-у «Югстройсервис» зыфиIорэм сомэ миллиони 3,7-м ехъу зытефэгъэ зэзэгъыныгъэ дашIыгъ. Ащ къыдилъы­тэщтыгъ къэлэ гъэпсыкIэ зиIэ псэупIэу Лъэустэнхьаблэ иурамэу Кубанскэм тет спорт гупчэмрэ футбол ешIэпIэ цIыкIумрэ игъэкIотыгъэ гъэцэкIэжьын IофшIэнхэр яшIылIэгъэнхэр.
— «Псы къабз» зыфиIорэ федеральнэ проектыр псыр цIыфхэм аIэкIэзы­гъэхьэрэ системэр гъэкIэжьыгъэным фэшI лъэпкъ проектэу «ПсэупIэр ыкIи къэлэ щыIакIэр» зыфиIорэм къыдыхэлъытагъэу аштагъ. Ащ ишIуагъэкIэ псыу­бытыпIэ тшIыгъэ, кубическэ метрэ 70-м ар телъытагъ. Проектым диштэу псы­къычIэщыпIэхэр поселкэм щыдгъэпсыгъэх, — еIо КIыкI Аскэр.
Лъэустэнхьаблэ иурамэу Лениным ыцIэ зыхьырэм фэтэрыбэу зэхэт унэу тетхэм ащыщхэм ящагу изэтегъэпсыхьан гъэрекIо рагъэжьагъ. Ащ лъэсрыкIо гъогухэр фашIыгъэх, тIысыпIэхэр, къэзыгъэнэфырэ пкъыгъохэр щагъэуцугъэх. Джы мыгъэ ятIонэрэ чэзыоу автомобиль уцупIэхэр, кIэлэцIыкIу джэгупIэхэр щагъэпсыщтых, гыкIыгъэ пылъапIэхэр зы­щагъэгъушъыжьыщтхэр щагъэуцущтых, площадкэ пэпчъ къашIыхьащт.
Къэралыгъо программэхэмрэ ­лъэпкъ проектхэмрэ яшIуагъэкIэ къоджэ щы­IакIэм илъэныкъо пстэуми уахътэм ди­штэрэ зэхъокIыныгъэшIухэр афэхъух ыкIи а IофшIэныр джыри зэрэлъыкIо­тэщтыр пащэм хигъэунэфыкIыгъ.
Лъэпшъыкъо Фатим.