Урысые Федерацием и Уголовнэ Кодекс ия 228.1-рэ статья ия 4-рэ Iахь ыкIи ия 30-рэ статья ия 3-рэ Iахь къызэрэдалъытэу къызэIуахыгъэгъэ уголовнэ Iофэу хэбзэнчъэу наркотикхэр е акъылыр зэщызыгъэкъорэ веществохэу ахэм яхьыщырхэр зыгъэхьазырхэу, зыщэхэу ыкIи къезыгъэкIокIыхэрэм япхыгъэр Мыекъуапэ хэгъэгу кIоцI IофхэмкIэ и ГъэIорышIапIэ следствиехэмкIэ иотдел джырэблагъэ зэхифыгъ.

Наркотикхэм япхыгъэ бзэджэшIагъэхэр зэрахьагъэу агъэмысэрэ кIэлитIу хьыкумым ыпашъхьэ къи­уцощт. Ахэр Мыекъуапэ щэпсэух, кIалэхэм илъэс 24-рэ ыкIи 26-рэ аныбжь.
Следствиер кIо зэхъум зэрагъэунэфыгъэу, 2024-рэ илъэсым ыкIэхэм адэжь мы нэбгыритIум Интернетым иамалхэр къызфагъэфедэхэзэ амыгъэунэфыгъэ цIыфэу бзэджэшIагъэхэр зэхэзыщэхэрэм нэIуасэ фэхъугъэх ыкIи нэужым а нэбгырищым зэзэгъыныгъэ зэдашIыгъ къалэу Мыекъуапэрэ ащ ихьанэ-гъу­нэхэмрэ наркотикхэм апае гъэбылъыпIэ чIыпIэхэр ыпкIэ хэлъэу ащагъэхьазырынхэу.
Хэбзэнчъэу ахъщэ къэзыгъэхъэнэу фэегъэ кIа­лэхэм ящыкIагъэр зэкIэ джащ лъыпытэу къаIэкIагъэхьагъэх: мобильнэ зэпхыныгъэр, Интернетыр, Iахь-Iахьэу наркотикхэр зэрэбгощыщт ыкIи Iалъ­мэкъ цIыкIухэм ахэр зэрарыплъхьащт Iэмэ-псымэхэр.
БзэджашIэхэр зэрэзэзэгъыгъэхэу, кIалэхэм «Iоф­шIэнэу» ашIэрэм ыпкIэ криптовалютэу яэлектроннэ ахъщалъэхэм къаралъхьанэу щытыгъ.
Мы илъэсым имэзэе мазэ бзэджэшIагъэр зезыхьэмэ зышIоигъохэм якъэбар Адыгэ Республикэм хэгъэгу кIоцI IофхэмкIэ иминистерствэ и ГъэIорышIапIэу наркотикхэр къызэрэрагъэкIокIыхэрэм лъыплъэрэм иIофышIэхэм къаIэкIэхьагъ. Нэужым ахэр ары къэубытын Iофыгъохэр зэхэзыщагъэхэри.
Полицием иоперативнэ IофышIэхэм зэшIуахыгъэ Iофыгъохэм яшIуагъэкIэ наркотикхэм апае гъэбылъы­пIэ чIыпIэ 58-рэ республикэм икъэлэ шъхьаIэ къыщыхагъэщыгъ.
Зэхэфынхэм къызэрагъэлъэгъуагъэу, бзэджэшIа­гъэр зезыхьагъэу агъэмысэхэрэм къаIахыгъэ наркотикэу «мефедронкIэ» заджэхэрэм ионтэгъугъэ грамм 45-м нэсыгъ, «гашиш» зыфаIорэр грамм 500 фэдиз икъугъ.
Джырэ лъэхъан прокуратурэр зыкIэтхэгъэ уголовнэ Iофыр хьыкумым агъэхьыгъ. Агъэмысэхэрэр аубытыгъэх. Хабзэу щыIэм къызэрэдилъытэу, ахэм илъэс 20-м нэсэу хьапс атыралъхьан алъэкIыщт.

Гъомлэшк Байзэт.