Лъэныкъуабэ къызэлъызыубытырэ спорт псэолъакIэ Мыекъуапэ игурыт еджапIэу N 7-м щашIынэу рагъэжьагъ.

АР-м и ЛIышъхьэ ителеграм-нэкIубгъо къызэрэщитхыгъэмкIэ, боксымкIэ Адыгэ Республикэм и Федерацие ыкIуачIэкIэ мы еджапIэм хэт боксымкIэ спортзалым игъэкIотыгъэ гъэцэкIэжьынхэр рашIылIагъэх. Мыщ спорт еджапIэу С.М. Джэнчатэм ыцIэ зыхьырэм испортсменхэм зыщагъасэ. Джы ахэм апае стадионыр зэтырагъэпсыхьэ. Площадкэм къыдыхэлъытэгъэщтых спорт оборудование зэфэшъхьафхэр, футбол ыкIи баскетбол ешIапIэхэр, къызщачъыхьан алъэкIыщт чIыпIэр.
Анахьэу анаIэ зытырагъэтыщтыр спорт псэуалъэр щынэгъончъэу щытыныр ары. ДэкIыгъо зэхэсыгъоу щыIагъэм щызэдаштагъ мыщ къыпэIулъ унэе псэупIэхэм алъэныкъокIэ чэу ашIынэу ыкIи стадионыр къэзыгъэнэфыщтхэр агъэуцунхэу.
Спорт инфраструктурэм хэхъоныгъэ ышIыным иIофыгъо АР-м и ЛIышъхьэу КъумпIыл Мурат сыдигъуи ынаIэ тет. Ащ пчъагъэрэ ипсалъэхэм къащыхигъэ­щыгъ спорт псэуалъэхэм язэтегъэпсы­хьан ишIуагъэкIэ шъолъырым спорт лъэпкъ зэфэшъхьафхэм зызэрэщаубгъу­щтым дакIоу, зипсауныгъэ зыгъэпытэ зышIоигъо ныбжьыкIэхэм япчъагъэ зэрэхэхъон фаер.
— Спорт псэуалъэм ишIын пэIухьащт мылъкур Адыгеим боксымкIэ и Федерацие къы­тIупщыгъ, муниципалитетым ибюджет къыхэгъэкIыгъэ ахъщэри агъэфедэщт. Мы илъэсым ыкIэм нэс псэолъэшI IофшIэнхэр тыухынхэу тэгъэнафэ. Ащ зэфэхьысыжьэу фэхъурэм тиспортсменхэри, мы еджапIэм чIэсхэу псэолъакIэм зыщызгъэсэщтхэри щыгушIукIынхэу сэгугъэ, — къыIуагъ Адыгеим и ЛIышъхьэ.