ПсыкъечъэхыпIэу Рыфабгъо адыгэ къужъым и Мафэ блэкIыгъэ шэмбэтым щыхагъэунэфыкIыгъ.

Шэны зэрафэхъугъэу, къужъ чъыгхатэхэр зытет Iуашъхьэм илъэс 200-м къехъу зыныбжь адыгэ къужъэу къыщыкIыхэрэм яплъы зышIоигъэхэр къэзэрэ­угъоигъэх, «Адыгэ хабз» зыфиIорэ этнолагерым щыIэ ныбжьыкIэхэри къужъхэм адэжь дэкIоягъэх, зэкIэмкIи купым нэбгыри 150-рэ фэдиз хэтыгъ. Къэбэртэе-Бэлъ­къа­рым, Тыркуем, Шам, респуб­ликэм ирайон зэфэ­шъхьафхэм къарыкIыгъэхэр зекIом хэлэжьагъэх. Гъогур зышIэрэ зекIозещэ ахэм ягъусагъ. Мыекъуапэ иполитехническэ колледж икIэлэегъаджэу Къудаикъо Нуриет адыгэ къужъым шIуа­гъэу пы­лъым, икъэгъэ­нэжьын мэхьанэу иIэм купыр щигъэгъо­загъ.

— Мы Iуашъхьэхэм атет къужъ чъыгхатэхэр зэрэдгъэунэфы­гъэмкIэ, хъутIэмы (черкесский бергамот) зыфатIорэ къужъ лъэпкъым щыщых. Чъыгхэр жъы хъугъэх, огъур къягоуагъ. Мыхэр адыгэ чъыгхатэхэм янэпэеплъых, ясаугъэтых. Уафэсакъын, къызэтебгъэнэнхэ фае, — хигъэунэфыкIыгъ Къудаикъо Нуриет.
Сыд фэдизэу зекIор хьылъагъэми – мэфэ жъоркъым мэзым упхырыкIызэ Iуашъхьэм удэкIоеныр Iоф къызэрыкIоу щытыгъэп — чъыгхатэхэм анэсыгъэ ныбжьыкIэхэм къужъхэр къыща­угъоигъэх, адыгэ быракъхэр аIыгъыхэу щыуджыгъэх.
Къызехыжьыхэм, псыкъечъэхыпIэу Рыфабгъо мэфэкIыр зэрэщыкIо хабзэу щызэхэщэгъагъ: къужъыр зыдэлъ хьалыжъохэм яшхынкIэ ныбжьыкIэхэр зэнэкъокъугъэх, мэфэкI концертым лъэпкъ орэдымкIэ ыкIи къашъомкIэ къэралыгъо ансамблэу «Ислъамыир», творческэ зэхэт купэу «Ошъадыр», ансамблэу «Ошъутенэр» хэлэжьагъэх.