ФутболымкIэ Урысыем изэнэкъокъу иятIонэрэ лигэ икупэу «Б-м» хэт «Зэкъошныгъэм» мэхьанэшхо зиIэ текIоныгъэ къыдихыгъ, я 22-рэ турым къыдыхэлъытэгъэ ешIэгъоу командэу «Ростов-2-м» дыриIагъэр къышIуихьыгъ.

Зэкъошныгъ» — «Ростов-2» — 1:0 (0:0).
Къэлапчъэм Iэгуаор дэзыдзагъэр: Г. Абдуллаевыр — я 52-рэ такъикъым.
«Зэкъошныгъэм» щешIагъэх: Т. Хачировыр (къэлэпчъэIут), У. Магомедбековыр, С. Черджиевыр, Р. Трефиловыр, К. Юшко, К. Антонец, Э. Цанава (А. Малкандуевыр), З. Коблыр (Д. Ширковскэр), Г. Абдуллаевыр (Д. Антоненкэр), Е. Рагулькиныр (М. Гаджимагомедовыр), А. Делэкъор (Т. Хэхьыр).
Тренер шъхьаIэр — С. Мирошниченкэр.
«Ростов-2-м» хэтыгъэх: Д. Ря­зановыр (къэлэпчъэIут), Р. По­ляковыр, И. Веселковыр, М. Жуковыр (Г. Суановыр), А. Мухиныр, М. Алимовыр (Н. Андрияновыр), А. Амосовыр, Р. Асенчуковыр, А. Вакулич, Н. Куприяновыр, В. Рассадин (В. Каспарян).
Тренер шъхьаIэр — А. Аброскиныр.
Апэрэ чIыпIихым афэбэнэным фэшI мы зэIукIэгъум тикомандэкIэ мэхьанэшхо иIагъ. Ащ фэгумэкIырэ нэбгырэ 500-м ехъу респуб­ликэ стадионым къыщызэрэугъо­игъ, Ростов-на-Дону къикIыгъэхэри зэIукIэгъум еплъыгъэх. «Зэкъо­шныгъэр» ешIэгъум иапэрэ такъикъхэм къащегъэжьагъэу текIоныгъэм фэбэнагъ. Апэрэ таймым футболистхэр псынкIэу ешIагъэх, къэлапчъэм Iэгуаор дадзэнымкIэ амалышIухэр яIа­гъэх. Ау пчъагъэр къызызэIуахыгъэр ятIонэрэ кIэлъэныкъом ия 52-рэ такъикъ ары. Тикомандэ хэт Гаджимурад Абдуллаевыр къэлапчъэм метри 9 фэдизкIэ пэчыжьэу ащ дэуагъ ыкIи Iэгуаор дидзагъ. Пчъагъэр 1:0-у зэIукIэгъур аухыгъ, Адыгеим икомандэ текIоныгъэр къыдихыгъ.
— Командэр зэрешIагъэм лъэ­шэу сигъэрэзагъ, тифутболистхэм сарэгушхо, яфэшъуашэу текIоныгъэр къыдахыгъ, — къыIуагъ зэфэхьысыжьхэр къышIызэ «Зэкъошныгъэм» итренер шъхьа­Iэу Сергей Мирошничеyкэм.
Я 22-рэ турым бысым командэхэу «Победэм», «Севастополь» ыкIи «Шъачэ-2-м» текIоныгъэхэр къыдахыгъэх. «Ангуштрэ» «Кубань Холдингымрэ» ешIэкIэ дахэ къагъэлъэгъуагъ. «Нартрэ» «Динамо Ставропольрэ» язэIукIэгъу пчъа­гъэр зэфэдизэу аухыгъ.
Я 22-рэ турым изэфэхьысыжьхэр:
«Зэкъошныгъ» — «Ростов-2» — 1:0, «Нарт» — «Динамо Ставрополь» — 0:0, «Спартак-Налщык» — «Ангушт» — 0:4, «Победа» — «Динамо-2» — 3:2, «Севастополь» — «Рубин Ялта» — 2:1, «Шъачэ-2» — «Астрахань» — 2:0.
Турнир таблицэм пэрытныгъэ щызыIыгъыгъэ «Динамо Ставрополь» апэрэ чIыпIищым щыт командэхэм къахэзыгъ, «Победэр» зэкIэми апэ ит, «Севастополь» ятIонэрэ хъугъэ, ящэнэрэ чIыпIэр «Кубань Холдингым» еубыты. «Зэкъошныгъэр» джыри нахь къыдэкIоягъ ыкIи я 6-р. Зичэзыу ешIэгъур тикомандэ шышъхьэIум и 23-м иIэщт, «Динамо-Ставрополь» IукIэщт.
Командэхэр зыдэщыт чIыпIэхэр ыкIи очко пчъагъэу рагъэ­къугъэр:

1. «Победа» — 44.
2. «Севастополь» – 43.
3. «Кубань Холдинг» — 42.
4. «Динамо Ставрополь» — 42.
5. «Ростов-2» — 37.
6. «Зэкъошныгъ» — 33.
7. «Шъачэ-2» — 31.
8. «Нарт» – 30.
9. «Астрахань» — 30.
10. «Легион» — 27.
11. «Рубин Ялта» — 25.
12. «Ангушт» — 20.
13. «Спартак-Налщык» — 14.