Теннис цIыкIумкIэ Адыгэ Республикэм изэIухыгъэ зэнэкъокъу Мыекъуапэ щыкIуагъ. Ащ кIэщакIо фэхъугъ УФ-м теннис цIыкIумкIэ и Федерацие. Илъэс заулэ хъугъэу программэу «Урысыем инеущырэ маф» зыфиIорэр ащ щыIэныгъэм щыпхырещы. Ащ ишIуагъэкIэ зэнэкъокъур зыщызэхащэрэ шъолъырым спорт оборудованиер ыкIи Iэмэ-псымэхэр IэкIагъахьэх.

Адыгеир турнирым къыщызыгъэлъэгъуагъэхэр республикэм икъэлэ шъхьаIэ, Адыгэкъалэ, Мыекъопэ ыкIи Кощхьэблэ районхэм ялIыкIохэр ары. Тиспортсменхэм ухьазырыныгъэ дэгъу къагъэлъэгъуагъ, текIоныгъэм фэбэнагъэх. Къэралыгъом ишъолъыр 12-мэ къарыкIыгъэ нэбгырэ 221-мэ заушэтыгъ. Республикэ спорт еджапIэу N 3-м зыщызыгъэсэрэ Дмитрий Работяга хагъэунэфыкIырэ чIыпIэхэр къыдихыгъэх. Унэе зэнэкъокъухэм къадыхэлъытагъэу ящэнэрэ чIыпIэм фэбанэзэ ар Мыекъуапэ щыщ Артем Вариводиным IукIагъ ыкIи 3:1-у къышIуихьыгъ. Краснодар ыкIи Ставрополь крайхэм, Респуб­ликэу Къырым яспортсменхэр ары нахь къахэщыгъэхэр.