УФ-и и Правительствэ къышIыгъэ зэфэхьысыжьхэмкIэ, 2025-рэ илъэсым имэзихэу пыкIыгъэм Адыгеим зекIоным зызэрэщиушъомбгъурэм процент 79,1-кIэ щыхэхъуагъ, ар къэралыгъом щашIыгъэ къэлъытэн-хэм ипчъэгъэ анахь дэгъухэм ащыщ.

ЗекIоным Адыгеим зэрэ­щыхахъорэр хагъэунэфыкIыгъ вице-­премьерэу Дмитрий Чернышенкэмрэ УФ-м экономикэ хэхъоныгъэмкIэ и Министерствэ ипащэу Максим Решетни­ковымрэ.
Федеральнэ гупчэм иIэпыIэгъукIэ ыкIи вице-премьерэу Дмитрий Чернышенкэр ежь ышъ­хьэкIэ мы Iофым къызэрэхэлажьэрэм яшIуагъэкIэ зекIоным хэхъоныгъэшIухэр ышIы­гъэх. 2024-рэ илъэсым, фэдэ къыхэмыкIыгъэу, республикэм зекIо мин 865-рэ къихьагъ.

— ЗекIоным ылъэныкъокIэ хэхъоныгъэшIухэр зышIырэ шъо­лъырхэм ахэтэу Адыгеир тапэ-
кIи зэрэлъыкIотэщтым сицыхьэ телъ. Зимылъку къыхэзылъхьэ­хэрэм ыкIи хьакIэщ IофышIэхэм къащыублагъэу, зекIозещэхэм ыкIи IэпэщысэшIынымкIэ Iэпэ­Iасэхэм анэсыжьэу мы лъэныкъом зишIуагъэ хэзылъхьэрэ пстэуми тхьашъуегъэпсэу ясэIо. ХьакIэхэм тикультурэ, тичIыопс идэхагъэ ядгъэшIэным, тицIыф­хэм IофшIэн яIэным, унэе Iоф­шIапIэхэр къызэIуахышъунхэм тызэгъусэу тыдэлажьэ. Къыд­дэ­хъурэм тыкъыщыуцурэп. «Лэ­гъонакъэ» зыфиIорэ экоку­рорт- зыгъэпсэфыпIэ иным, ДжэгокIо гъэхъунэм итыщт лъэпкъ паркым яшIын епхыгъэ Iоф­тхьабзэхэр лъытэгъэкIуатэх. Зе­кIохэр тишъолъыр нахь лъэшэу къыфэзыщэщт лъэныкъохэу — чIыопсым идэхагъэ, икъэбзагъэ, лъэпкъ шхыныгъоу шъолъырым щашIыхэрэм ащыгъэгъозэгъэнхэм, лъэпкъ культурэр, тарихъыр къэгъэлъэ­гъогъэнхэм игъэкIотыгъэу Iоф адэтэшIэ. Ащ фэдэу лъэпкъ шхыныгъо цIэрыIоу, Адыгеим инэпэеплъэу адыгэ къуаем ифестивалэу Iоныгъом и 13 — 14-м республикэм щыкIощтым лъэпкъ культурэм ыкIи тари­хъым, шэн-хабзэхэм уасэ афэзышIырэ пстэури къесэгъэ­благъэ, — къыщитхыгъ АР-м и ЛIышъхьэу КъумпIыл Мурат ителеграм-нэкIубгъо.