ШышъхьэIум и 1-м къыщыублагъэу и 10-м нэс гъогурыкIоным ишапхъэхэр аукъуагъэхэу Адыгэ Республикэм хъугъэ-шIэгъэ 2019-рэ щагъэунэфыгъ. Водитель 26-рэ ешъуагъэу рулым Iусхэу къагъэуцугъ.

Къэралыгъо автоинспекцием зэригъэунэфыгъэмкIэ, нахьыбэу гъогурыкIоным ишапхъэхэр зыщаукъохэрэр Мыекъуап, Мыекъопэ, Теуцожь ыкIи Тэ­хъутэмыкъое районхэр ары. Гъогухэм къащыхъурэ хъугъэ-­шIагъэхэм нахьыбэрэмкIэ алъа­псэр яуахътэ къэмысыгъэу нэф­рыгъуазэм зэрэтехьэхэрэр, лъэсрыкIохэр зэрэбламыгъэ­кIыхэрэр ыкIи ямыгъогу зэрэтелъадэхэрэр ары.
Къэралыгъо автоинспекцием икъулыкъушIэхэм илъэс 51-рэ зыныбжь хъулъфыгъэу Мые­къуапэ къыщагъэуцугъэр ешъуа­гъэу гу лъатагъ ыкIи медицинэ уплъэкIуныр рагъэшIыгъ. КъулыкъушIэхэр зэгуцэфагъэхэр къэшъыпкъэжьыгъ. Нэужым зэрагъэунэфыгъэмкIэ, мыщ ыпэ­кIи ар ешъуагъэу къагъэуцуи, уголовнэ пшъэдэкIыжь тыралъхьагъ ыкIи рулым IутIысхьан фимытэу итхылъхэр Iахыгъагъ. Ау хъулъфыгъэр ащ къыгъэу­цугъэп.
Автомобилыр ащ Iахыгъ ыкIи тазыр зытелъ машинэхэр зыдэт уцупIэм афыгъ. Хъулъфыгъэм ылъэныкъокIэ уголовнэ Iоф къызэIуахыгъ.
АР-м хэгъэгу кIоцI IофхэмкIэ и Министерствэ шъугу къегъэ­кIыжьы, ешъуагъэу машинэр зезыфэхэрэм апае хэбзэгъэуцугъэм тазыр ин къегъэнафэ, ащ нэмыкIэу машинэр зэрифэн фимытэу итхылъхэр Iахы. Къэ­Iогъэн фае, ятIонэрэу ешъуа­гъэу къызаубытыкIэ, илъэси 3-м нэс хьапс водителым тыралъхьан алъэкIыщт.