Апэрэ IэпыIэгъур цIыфхэм языгъэкIыщт гуфэкIо-инструк­торхэр Народнэ фронтым ыгъэхьазырыгъэх, Урысыем ишъолъыр 14-мэ къарыкIыгъэхэр а Iофтхьабзэм хэлэ­жьагъэх.

Егъэджэнхэр Краснодар щызэха­щагъэх. Пшызэ шъолъыр икъэлэ шъхьаIэ зыщызыгъэхьазырыгъэ нэбгырэ 25-мэ Адыгэ Республикэм, Донецкэ ыкIи Луганскэ народнэ республикэхэм, За­порожскэ хэкум, джащ фэдэу хэгъэгу гъунапкъэм щыIэ шъолъырхэм ялIыкIохэр ахэтыгъэх.
ИгъэкIотыгъэ программэу «Къэуцу, лъыр» зыфиIорэм иящэнэрэ едзыгъоу хъугъэх мы егъэджэнхэр. БлэкIыгъэ илъэсым ишэкIогъу мазэ Народнэ фронтым иныбжьыкIэхэу шъолъыр 11-мэ къарыкIыгъэхэм программэр акIугъ, ятIонэрэ едзыгъом хэгъэгум ишъолъыр 20 зэлъиубытыгъагъ. ШIэныгъэу егъэджэнхэм ащызэрагъэгъотыгъэхэр ячIыпIэ щыпсэухэрэм нэужым щарагъэшIэжьых. ГуфакIохэм яегъэджэн епхыгъэ Iофтхьабзэхэр Народнэ фронтым тапэкIэ зэрэ Урысыеу щызэхищэн мурад иI.
«Апэрэ IэпыIэгъур цIыфхэм ябгъэ­кIыным ишIыкIэхэр зэбгъэшIэнхэм мэхьанэшхо етэты — ощ паекIи, укъэ­зыуцухьэхэрэмкIи ар Iэрыфэгъу. Джащ пае пшъэрылъэу зыфэдгъэуцужьырэр щынэгъончъэным икультурэ тишъолъыр зыщедгъэушъомбгъуныр ары, сыд фэдэрэ хъугъэ-шIагъи тицIыфхэр фэхьа­зырынхэ фае», — къыддэгощагъ Народнэ фронтым иныбжьыкIэхэм ялIыкIоу Адыгэ Республикэм щыIэ Никита Зоровыр.
Тактическэ ухьазырыныгъэмкIэ Гуп­чэу «Архангел» зыфиIорэм иинструктор куп ары тапэкIэ мы IофшIэныр лъызыгъэкIотэщтыр.