АР-м лъэпкъ IэпэщысэшIыным пылъхэм я Ассоциацие ипащэу Гумэ Ларисэ игукъэкIыкIэ ­«Лъэпкъ Iэпэщысэхэу искусствэ хъугъэхэр-2» зыфиIорэ проектым шъолъыр грантыр къыри­хыгъэу ащ къыдилъытэрэ Iоф­тхьабзэхэм язэшIохын ащ хэтхэр фежьагъэх.

Лъэпкъ IэпэщысэшIыным ишIыкIэ-­амалхэр къызэтегъэнэгъэнхэр ыкIи къыткIэхъухьэрэ ныбжьыкIэхэм ахэр ягъэшIэгъэнхэр проектым ипшъэрылъ шъхьаI. Гъэсэныгъэм иучреждениехэмрэ лъэпкъ IэпэIасэхэмрэ ащ зэрипхыщтых. Гурыт еджапIэхэм ащеджэхэрэр, республикэм иIэпэIасэхэр Iофтхьабзэхэм ахэлэжьэщтых.
Проектым лъэныкъо шъхьаIи 4 къыдыхэлъытагъ:
— «лъэпкъ Iэпэщысэхэу искусствэ хъугъэхэр» зыфиIорэ къэгъэлъэгъуапIэм музеим чIэлъ пкъыгъохэм атехыгъэу хахьэхэрэм япчъагъэ хэгъэхъогъэныр;
— лъэпкъ IэпэIэсэныгъэмкIэ десэхэр Адыгэ ыкIи Къэрэщэе-Щэрджэс респуб­ликэхэм ащызэхэщэгъэнхэр;
— «IэпэIэсэ цIыкIу» зыфиIорэ я 2-рэ фестиваль-зэнэкъокъу сабыйхэм апае зэхэщэгъэныр ыкIи IэпэIасэхэм якъэгъэ­лъэгъонхэр регъэкIокIыгъэнхэр;
— Iофтхьабзэхэм язэфэхьысыжьэу Iэнэ хъурае зэхэщэгъэныр.
«Лъэпкъ Iэпэщысэхэу искусствэ хъугъэхэр» зыфиIорэ проектым амалышIу­хэр къетых: музейхэм ачIэлъ пкъыгъо хьалэмэтхэм атехыгъэу ашIырэ пстэур, гущыIэм пае, адыгэ шъуашэхэр, лъэпкъ музыкальнэ Iэмэ-псымэхэр къэгъэ­лъэгъопIэ мэкIаехэм ателъ къодыеу щымытэу, цIыфхэм нахь благъэу зэ­рагъэшIэнхэу, шIоигъоныгъэ зиIэхэм шъуа­шэхэр зыщалъэнхэ, Iэмэ-псымэхэм къа­рагъэIонхэ алъэкIыныр.
Къэрэщэе-Щэрджэсым ыкIи Адыгэ Республикэм ащызэхащэщт десэхэм сабыйхэр бэу ахагъэлэжьэнхэ ямурад. ЛъэпкъыбзэкIэ егъэджэнхэр рагъэкIо­кIыщтых, адыгэ Iэпэщысэхэм яшIын апылъ шъэфхэр сабыйхэм арагъэшIэщтых, адыгэ шэн-хабзэхэр къыдалъытэзэ, пIуныгъэ мыхьанэ куу ахэлъэу де­сэхэр рагъэкIокIыщтых.
— Лъэпкъ пэпчъ икультурнэ кIэн къэухъумэгъэным мыщ фэдэ Iофтхьабзэхэр фэIорышIэх. Адыгэ Iэпэщысэхэр лъэпкъым культурэм исаугъэтых. ЯцIыкIугъом щыублагъэу сабыйхэм ахэр алъэгъунхэ, аIэкIэлъынхэ, афэнэIосэнхэ фае. Ащ фэдэу зыхъурэм, зыщыщхэ лъэпкъым икультурэ зэрашIэщтым имызакъоу ежь Iэпэщысэхэми ящыIэныгъэ лъыкIотагъэ мэхъу, непэрэ мафэм пытэу къыхэуцожьых, — хигъэунэфыкIыгъ проектыр зигукъэкIэу Гумэ Ларисэ.
Апэрэ Iофтхьабзэу IэпэIасэхэм зэхащэгъагъэр зыфэгъэхьыгъагъэр пшъэшъэ шъуашэм иIэшъхьэ бэлагъэхэм яшIын. ДышъэидагъэмкIэ IэпэIасэхэр ащ хэлэжьэгъагъэх.
АР-м и Лъэпкъ музей ихъарзынэщ хэлъ пшъэшъэ шъуашэр къыхахыгъ. Я XX-рэ лIэшIэгъум иублапIэ Къуаджэ зэшыпхъухэм ар адыгъагъ. Музеим иIофышIэхэр яIэпыIэгъухэу IэпэIасэхэм шъуашэм иIэшъхьэ бэлагъэхэм атет тхыпхъэхэр къаплъыхьагъэх, ахэр зэ­рэ­хэдыкIыгъэ шIыкIэхэр агъэунэфыгъэх, дышъэидэр зэрэхэдыкIыгъэм ишапхъэхэр агъэфедэжьыхэзэ ащ техыгъэ Iэшъхьэ бэлагъэр кIэу ашIыщт.
Тэу Замир.