Республикэу Татарстан илIыкIо куп Адыгеим щыIагъ. Адыгэ Респуб­ликэм и ЛIышъхьэу КъумпIыл Мурат лIыкIо купым ипащэу, Татарстан и Премьер-министрэ игуадзэу, къэндзалхэм я Дунэе кон­гресс и Лъэпкъ Совет итхьаматэу Василь Шайхразиевым зэIукIэгъу дыриIагъ.

Ащ хэлэжьагъэх АР-м культурэмкIэ иминистрэу Аулъэ Юрэ, Адыгеим лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковыр, программэу «ЛIыхъужъхэм яуахът» зы­фиIорэм хэлэжьэрэ Сергей Ковалевыр, къэндзалхэм я Дунэе конгресс, обществэу «Дуслыкым» япащэхэр ыкIи ялIыкIохэр.
Адыгеим и ЛIышъхьэ шIуфэс гущыIэхэмкIэ хьакIэхэм зафигъэзагъ, культурэм ыкIи Iоф­шIэным алъэныкъокIэ шъолъыритIум язэпхыныгъэ гъэпытэ­гъэным мыщ фэдэ зэIукIэхэр зэрэфэIорышIэхэрэр хигъэунэ­фыкIыгъ.
— Урысыем и Къыблэ щыIэ къэндзал общественнэ орга­низациехэм язэхэсыгъо илъэсым ипэублэ Адыгеим зэрэщызэхащагъэр лъэшэу тигопагъ. Мамырныгъэр къэухъумэгъэным, лъэпкъ ыкIи дин зэгурыIоныгъэр гъэпытэгъэным яIофыгъо­хэр ащ къыщаIэтыгъэх. Адыгеим ыкIи Татарстан ащыпсэухэрэм зэкъош ныбджэгъуныгъэу азыфагу илъым ишIуагъэкIэ шъо­лъыритIум тапэкIи хэхъоныгъэ зэрашIыщтым сицыхьэ телъ, — къыIуагъ КъумпIыл Мурат.
Республикэм ипащэ къызэ­рэхигъэщыгъэмкIэ, Казань къы­щыхъугъэу программэу «ЛIы­хъужъхэм яуахът» зыфиIорэм хэлэжьэрэ Сергей Ковалевыр игуапэу зэIукIэгъум къекIолIагъ ичIыгогъухэм шIуфэс къарихынэу.
Дахэу къазэрапэгъокIыгъэ­хэмкIэ бысымхэм зэрафэразэр Василь Шайхразиевым хигъэунэфыкIыгъ. Урысыем и Президент игукъэкIкIэ аштэгъэ программэу «ЛIыхъужъхэм яуахът» зыфиIорэм Та­тарстани мэхьанэшхо зэрэ­щыратырэр къыIуагъ.
— Мы лъэныкъом лъэшэу тынаIэ тет. ТилIыхъужъхэм шъхьэ­кIафэ афэтшIыныр атефэ. ЫпшъэкIэ зигугъу къэтшIыгъэ программэу, къэндзалыбзэкIэ зэбдзэкIымэ «Батырлар» зыцIэр хэушъхьафыкIыгъэ дзэ операцием иветеранхэм щыIэныгъэм чIыпIэ гъэнэфагъэ щаубытыным, республикэм хэхъоныгъэ ышIыным афэIорышIэ, — къыIуагъ Татарстан ивице-премьер.
Василь Шайхразиевым къызэриIуагъэмкIэ, Адыгеим къызкIэкIуагъэхэр къэндзал общест­веннэ организациехэм язэхэсыгъоу щыIагъэм щаштэгъэ унашъохэм ягъэцэкIэн къыкIэлъэкIо. Адыгеим ихэбзэ къулыкъухэмрэ зэхэсыгъом хэлэ­жьагъэхэмрэ зэдаштэгъагъ къэн­дзал­хэр бэу зыщыпсэухэрэ къутырэу Политотделым дэт къэхалъэр шапхъэхэм адиштэу зэтырагъэпсыхьажьынэу. Джащ фэдэу ТекIоныгъэм ия 80-рэ илъэс ихэгъэунэфыкIын къы­дыхэлъытагъэу заом хэкIода­гъэхэм ячIыпIэ саугъэт Советскэ Союзым и ЛIыхъужъэу, къэндзал усакIоу ыкIи журналис­тэу Муса Джалиль ибюст къыщызэIуахынэу унашъо ашIыгъ.
Дунэе къэндзал конгрессым хэтхэу мы проектым игъэцэкIэн къыдезыгъэштагъэхэм ыкIи IэпыIэгъу къыфэхъугъэхэм зэрафэразэр Адыгеим и ЛIышъхьэ хигъэунэфыкIыгъ.
Муниципальнэ къулыкъухэм, индустриалнэ паркхэм яIофшIэн изэхэщэн, лъэпкъ проектхэм ыкIи къэралыгъо программэхэм ягъэцэкIэн, инвестиционнэ проектхэм анаIэ атырагъэтыным, нэмыкI лъэныкъохэм къэзэрэугъоигъэхэр атегущыIагъэх. Экономикэм илъэныкъо зэфэшъхьафхэмкIэ ыкIи социальнэ псэолъэшIынымкIэ Татарстан ипащэхэм IэпэIэсэныгъэ зэ­ра­хэлъыр республикэм ипащэ хи­гъэунэфыкIыгъ.
ЗэIукIэгъум икIэух КъумпIыл Мурат шIуфэс гущыIэхэр фигъэ­загъэх IофшIэн ыкIи ныбджэгъу зэфыщытыкIэхэр зыдыриIэ Рес­публикэу Татарстан и ЛIышъхьэу Рустам Миннихановым.
АР-м и ЛIышъхьэ ипресс-къулыкъу