Къэндзалхэр нахьыбэу зыщыпсэухэрэ Кощхьэблэ райо­ным ит къутырэу Политотделым зэлъашIэрэ къэндзал усакIоу, Советскэ Союзым и ЛIыхъужъэу Муса Джалиль исаугъэт къыщызэIуахыгъ.

Мэхьанэшхо зиIэ Iофтхьабзэм хэлэжьагъэх АР-м ихэбзэ къулыкъушIэ­хэр, Адыгеим щыпсэурэ къэндзалхэм яобщинэ илIыкIохэр, къоджэдэсхэр.
Лениным ыцIэкIэ агъэнэфэгъэ шIу­хьафтыным илауреатэу, Советскэ Союзым и ЛIыхъужъэу Муса Джалиль исаугъэт къызэIуахыгъ Республикэу Та­тарстан и Премьер-министрэ игуадзэу, къэндзалхэм я Дунэе конгресс и Лъэпкъ Совет итхьаматэу Василь Шай­хразиевым, АР-м культурэмкIэ иминист­рэу Аулъэ Юрэ, Кощхьэблэ район администрацием ипащэу Хьамырзэ Заур.
— ТекIоныгъэм ия 80-рэ илъэс ыкIи Хэгъэгум иухъумакIо и Илъэс атефэу мы Iофтхьабзэр зэрэзэхэтщагъэр, къэн­дзал усэкIо цIэрыIоу Муса Джалиль исаугъэт къызэрэзэIутхыгъэр шIукIэ зы­фэтэлъэгъужьы. УсакIом итворчествэ ыкIи лIыгъэу зэрихьагъэр къыткIэхъу­хьэрэ ныбжьыкIэхэмкIэ щысэтехыпIэу щыт. Мы проектым ипхырыщынкIэ АР-м и ЛIышъхьэу КъумпIыл Мурат къызэрэддыригъэштагъэмкIэ лъэшэу сыфэраз. Татарстанрэ Адыгеимрэ я ЛIышъхьэхэм зэныбджэгъуныгъэу азыфагу илъым тырэгушхо. ТапэкIи шIушIэ IэпыIэгъум, экономикэм, бизнесым алъэныкъокIэ республикитIуми хэхъоныгъэхэр зэрашIыщтхэм, культурэм зыкъегъэIэтыгъэным яIахьышIу зэрэхашIыхьащтым сицыхьэ телъ, — къыIуагъ Василь ­Шайхрази­евым.
— НепэкIэ мы Iофтхьабзэр мэхьанэшхо зиIэ хъугъэ-шIагъэу щыт, — лъи­гъэкIотагъ гущыIэр Аулъэ Юрэ. — Муса Джалиль итворчествэ дэгъоу сыщыгъуаз, иусэхэр еджапIэм щызэдгъэшIагъэх. Ар усэкIо къодыеп, Советскэ Союзым и ЛIыхъужъ. АР-м ыкIи Республикэу Татарстан я ЛIышъхьэхэм зэпхыныгъэ фабэу азыфагу илъым ишIуагъэкIэ мыщ фэдэ саугъэтхэр къызэIуахых. Ти ЛIы­хъужъхэм яшIэжь зыщыдгъэгъупшэ хъу­щтэп. Адыгэхэмрэ къэндзалхэмрэ якуль­турэ зэхьыщыр, арышъ, тапэкIи тизэныбджэгъуныгъэ зэрэлъыдгъэкIотэщтым щэч хэлъэп.
Хьамырзэ Заур Iофтхьабзэм къекIолIагъэхэр ыгъэгугъагъэх Кощхьэблэ районым щыпсэухэрэм лIыхъужъым ишIэжь зэрагъэлъэпIэщтымкIэ, къыткIэхъухьэрэ лIэужхэм тарихъыр ащымыгъупшэу, ахэр ренэу ящысэтехыпIэу ныбжьыкIэхэр къызэрагъэтэджыщтхэмкIэ. Джащ фэдэу саугъэтым ишIын зиIахьышIу хэзышIыхьагъэхэм рэзэныгъэ гущыIэхэр ариIуагъ.
Нэужым къэндзал лъэпкъым хэхъоныгъэ егъэшIыгъэным, лъэпкъхэм азыфагу илъ культурэр, зэпхыныгъэр гъэпы­тэгъэнхэм ыкIи саугъэтым икъызэ­Iухын зиIахьышIу хэзышIыхьагъэхэм къэндзал­хэм я Дунэе конгресс и Лъэпкъ Совет ищытхъу тхылъхэр В. Шайхразиевым аритыжьыгъэх.
КIАРЭ Фатим.