Адыгэ Республикэм лъэпкъ IофхэмкIэ, IэкIыб къэралхэм ащыпсэурэ зэ­лъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет журналистхэм апае зэхищэгъэ зэнэкъокъоу «Атэжъ пIашъэхэм ячIыгу. БлэкIыгъэмрэ къэкIощтымрэ азыфагу» зыфиIорэм икIэуххэр зэфа­хьысыжьыгъэх. Анахь IофшIэгъэ дэгъухэр зыгъэхьазырыгъэ журналистхэр агъэшIуагъэх.

Комитетым итхьаматэ игуадзэу Константин Щербаковыр игуапэу журналистхэм къафэгушIуагъ. Хэкум къэзыгъэзэжьыгъэхэм алъэ­ныкъокIэ Iофэу ахэм агъэцакIэрэм хабзэмкIи обществэмкIи мэхьанэшхо зэриIэр хигъэунэфы­кIыгъ. ЦIыфхэм игъом къэбар шъыпкъэр алъагъэIэсызэ, ахэр зыгъэгумэкIырэ Iофыгъохэм язэхэфынкIэ, дунэееплъыкIэ тэрэз яIэ хъунымкIэ тапэкIи чанэу Iоф ашIэнэу, ягъэхъагъэхэм ахагъэхъонэу журналистхэм къафэлъэIуагъ.
— ЗичIыгужъ къэзыгъэзэжьыгъэхэр щыIэныгъэм хэгъэгъозэ­жьыгъэнхэр зэкIэми типшъэрылъ. Ахэм афэгъэхьыгъэу журналистхэм бэ къагъэлъагъорэр, къатхырэр. Адыге­им къэзыгъэзэжьыгъэ ти­лъэпкъэгъухэм ящыIэкIэ-псэукIэ зы­фэдэр нахь игъэкIотыгъэу къэбар жъугъэм иамалхэмкIэ ядгъэшIэн, ядгъэлъэгъун фае ахэм япчъагъэ нахьыбэ хъуным пае. Ар зиамалыр шъоры, журналистхэр ары. Джыри тапэкIэ нахь чанэу зэнэкъокъум шъухэлэжьэнэу тэгугъэ, — къыIуагъ К. Щербаковым.
Гъэзетхэм къащыхаутыгъэхэмкIэ апэрэ чIыпIэр фагъэшъошагъ «Советскэ Адыгеим» ижурналисткэу Юлия Косенкэм, «Адыгэ макъэм» иIофышIэхэу КIарэ Фатимэ я 2-рэ, Анцокъо Иринэ я 3-рэ чIыпIэхэр къыдахыгъэх.
Телевизионнэ къэтынхэмкIэ апэрэ чIыпIэр зыфагъэшъошагъэр Къэ­ра­лыгъо телерадиокомпаниеу «Адыгеям» ижурна­лист­кэу ТIэшъу Светлан. ЯтIонэрэ, ящэ­нэрэ чIыпIэхэр къыда­хыгъэх Къуижъ Ами­нэтрэ Гъу­кIэлI Сусанэрэ.
Лъэныкъоу «Радиокъэтынхэр» зыфиIорэмкIэ текIоныгъэр къыдихыгъ Къэралыгъо телерадиокомпаниеу «Адыгеям» радиомкIэ икъулыкъу ипащэу ХьакIэмыз Сусанэ. ЯтIонэрэ ыкIи ящэнэрэ чIыпIэхэр аубытыгъэх Бэгъушъэ Фатимэрэ Тыгъужъ Санятрэ.