Адыгеим и ЛIышъхьэу КъумпIыл Мурат илъэ­сыкIэ еджэгъум республикэм гъэсэныгъэмкIэ иорганизациехэр зэрэфэхьазырхэм иуплъэ­кIун къыдыхэлъытагъэу къалэу Мыекъуапэ дэт гурыт еджапIэу N 11-м щыIагъ.

Лъэпкъ проектэу «НыбжьыкIэхэмрэ кIэлэцIыкIухэмрэ» зы­фиIорэм диштэу федеральнэ проектэу «АнахьышIур зэкIэ кIэлэцIыкIухэм апай» зыцIэм тегъэпсыхьагъэу гъэсэныгъэ зыщарагъэгъотырэ организа­циехэм яигъэкIотыгъэ гъэцэкIэ­жьын ипрограммэ ар хэхьагъ. Республикэм и ЛIышъхьэ игъусагъэх АР-м иминистрэхэм я Кабинет и Тхьаматэ игуадзэу Хъоткъо Хъызыр, Мыекъуапэ имэрэу Геннадий Митрофановыр, гъэсэныгъэ зыщарагъэ­гъотырэ учреждением иадминистрацие илIыкIохэр, подрядчикхэр.
Гурыт еджапIэу N 11-р 1986-рэ илъэсым ашIыгъагъ, аужырэу загъэцэкIэжьыгъагъэр 2016-рэ илъэсыр ары. Джырэ игъэкIотыгъэ гъэцэкIэжьынхэм ялъэ­хъан жъы хъугъэ джэхэшъо те­дзэхэр, шъхьаныгъупчъэ блыпкъ­хэр агъэкIэжьыгъэх, псырыкIуапIэхэр, гъэфэбапIэр, электричествэ рыкIуапIэхэр агъэкIэжьыгъэх, инженер инфраструктурэр зэблахъугъ.
НепэкIэ унэкIоцI IофшIэнхэр ыкIэм фэкIох, шхапIэмрэ кабинетхэмрэ ящыкIэгъэщт Iэмэ-­псымакIэхэр агъэуцух. Щынэ­гъончъэным илъэныкъохэм ана­хьэу анаIэ атырагъэты: ма­шIом зыкъыштэмэ, макъэ къэзыгъэIущт пкъыгъохэр, видео­лъыплъэным иамалхэр агъэкIэ­жьых. Джащ фэдэу еджапIэм къыпэIулъ чIыпIэр зэтырагъэ­псыхьэ, къызыщычъэщтхэ гъогур стадионым фашIы, урамхэм якъэгъэнэфынкIэ агъэфедэрэ амалхэри агъэкIэжьых. А пстэуми сомэ миллиони 178,6-рэ фэ­диз апэIуагъэхьагъ.

КъумпIыл Мурат еджапIэм зыщэIэ лъэхъаным агъэкIэжьыгъэ кабинетхэр, пщэрыхьапIэр, спортивнэ залыр ыкIи еджапIэм къыпэIулъ чIыпIэр зэригъэлъэгъугъэх. IофшIэнэу агъэцакIэ­хэрэм афэгъэхьыгъэу подрядчикым къыIотагъ. ДжырэкIэ игъэкIотыгъэ гъэцэкIэжьыныр ыкIэм фэкIо, еджапIэм иунэу агъэкIэжьырэм Iоныгъом и 1-м къыщыублагъэу кIэлэцIыкIухэм еджэным щыпадзэжьыщт.
«ИлъэсыкIэ еджэгъум ехъу­лIэу еджапIэр зэрэпсаоу гъэ­кIэжьыгъэу щытын фае. Мые­къуапэ ичIыпIэхэу анахьыкIэу цIыфхэр зыщыпсэухэрэм ар ащыщ, кIэлэцIыкIу миным ехъу ащ щеджэ. Щынэгъончъэу, Iэрыфэгъоу еджэныр зэхэщэ­гъэным мэхьанэшхо иI, а пстэуми яшIуагъэ къэкIощт кIэлэ­цIыкIухэр еджэным нахь фэ­чэфынхэмкIэ, джырэ уахътэм диштэрэ унэ хъоо-пщаухэри Iоф ащашIэнымкIэ кIэлэегъаджэхэми гуIэтыпIэ афэхъущтых», — къыхигъэщыгъ республикэм и ЛIышъхьэ.
ЕджапIэм ипащэу Виктория Кузнецовам АР-м и ЛIышъхьэ ишIуагъэ къызэраригъэкIырэм пае зэрэфэразэр къыIуагъ, илъэсыкIэ еджэгъумкIэ гухэлъхэр зэрэрахъухьагъэхэм щи­гъэгъозагъ. КIэлэегъаджэхэм зэралъытэрэмкIэ, агъэкIэжьыгъэ инфраструктурэм амал къытыщт гъэсэныгъэр нахь шэпхъэ лъагэ­хэм адиштэу зэхэщэгъэнымкIэ ыкIи урокхэм къахимыубытэрэ Iофтхьабзэу зэшIуахыхэрэм нахь ахэхъонымкIэ.
ИкIэухым республикэм и ЛIышъхьэ министерствэмрэ Мые­къуапэ имэррэ пшъэрылъ къафишIыгъ Iофыгъоу къэуцухэ­рэр псынкIэу зэшIохыгъэнхэм ренэу ынаIэ тырагъэтынэу, еджа­пIэр щынэгъончъэ­нымкIэ Iофтхьэбзэ тедзэхэр зэ­рахьанхэу.
Шъугу къэтэгъэкIыжьы: мы аужырэ илъэсихым республикэм еджэпIакIэу 8 щашIыгъ. 2022-рэ илъэсым къыщегъэжьагъэу игъэкIотыгъэ гъэцэкIэжьынхэр еджэпIэ 20-мэ арашIылIэгъах. Урысыем гъэсэныгъэмкIэ и Министерствэ зэхищэгъэгъэ зэнэкъокъоу лъэпкъ проектэу «НыбжьыкIэхэмрэ кIэлэцIыкIу­хэмрэ» зыфиIорэм къыдыхэ­лъытагъэу гъэсэныгъэ зыщарагъэгъотырэ организациехэм яигъэкIотыгъэ гъэцэкIэжьынкIэ программэм хэлэжьэщтхэр къы­хахыхэ зэхъум, организацие 27-рэ Адыгэ Республикэм щагъэцэкIэжьынэу агъэнэфэгъагъ. Мы илъэсым Адыгеим имуници­палитет зэфэшъхьафхэм яеджэпIи 9-мэ яигъэкIотыгъэ гъэцэ­кIэжьын макIо.
Адыгэ Республикэм и ЛIышъхьэ
ипресс-къулыкъу