Къэралыгъо фондэу «Хэгъэгум иухъума­кIохэр» зыфиIорэм икъутамэу Адыгэ Республикэм щыIэм къызэрэщаIуагъэмкIэ, хэушъхьафыкIыгъэ дзэ операцием хэлажьэхэрэм якIэлэцIыкIухэм зэтыгъо ахъщэу сомэ мин 20-у аратырэм епхыгъэ унашъом зэхъокIыныгъэхэр фашIыгъэх.

Джы зэрэщытымкIэ, Урысые Федерацием инэмыкI чIыпIэхэм ренэу е охътэ гъэнэфагъэкIэ ащыпсэухэу, зикIэлэцIыкIухэр ренэу е охътэ гъэнэфагъэкIэ Адыгэ Республикэм щыIэхэм зэтыгъо ахъщэр аратыным ифитыныгъэ яI.
Мы зэхъокIыныгъэм мэхьанэу иIэр хэушъхьафыкIыгъэ дзэ операцием хэлажьэхэрэм якIэлэцIыкIухэу Адыгэ Рес­публикэм исхэм, ны-тыхэр зыщыпсэу­хэрэ чIыпIэм емылъытыгъэу, ахъщэ IэпыIэгъу аратыныр ары.
АР-м икъэралыгъо учреждениеу «ЦIыф­хэр IофшIэным епхыгъэу социальнэу къэухъумэгъэнхэмкIэ и Гупчэ» ипа­щэ игуадзэу КIыкI Зарэ къызэриIуа­гъэмкIэ, АР-м иминистрэхэм я Кабинет иунашъоу хэушъхьафыкIыгъэ купхэм ащыщхэу АР-м щыпсэухэрэм зэтыгъо ахъщэ IэпыIэгъу ятыгъэным фэгъэ­хьыгъ» зыфиIоу 2022 — 2025-рэ илъэсхэм ателъытагъэм къызэригъэнафэу, 2022- рэ илъэсым шэкIогъум къыщыублагъэу хэушъхьафыкIыгъэ дзэ операцием хэлажьэхэрэм якIэлэцIыкIухэм зэтыгъо ахъщэ IэпыIэгъу араты.
Унашъор заштагъэм къыщегъэжьа­гъэу мы IэпыIэгъур кIэлэцIыкIу 4785-мэ алъыIэсыгъ.
— 2025-рэ илъэсым бэдзэогъум и 28-м къыщыублагъэу Урысые Федерацием инэмыкI чIыпIэхэм ренэу е охътэ гъэнэфагъэкIэ ащыпсэухэу, зикIэлэцIыкIухэр ренэу е охътэ гъэнэфагъэкIэ Адыгэ Республикэм щыIэхэм зэтыгъо ахъщэр ятыгъэным фэгъэхьыгъэ уна­шъом зэхъокIыныгъэхэр фэхъугъэх. АР-м икъэ­ралыгъо учреждениеу «ЦIыфхэр IофшIэным епхыгъэу социальнэу къэухъумэгъэнхэмкIэ и Гупчэ» документхэр къырахьылIэнхэ алъэкIыщт. Ащ нэмыкIэу мы гупчэм иIофышIэ фондэу «Хэгъэгум иухъумакIохэр» зыфиIорэм икъутамэу Мыекъуапэ дэтым мафэ къэс сыхьатыр 3-м къыщыублагъэу 5-м нэс цIыфхэр регъэблагъэх. Джащ фэдэу гупчэм ­икъутамэхэу республикэм щылажьэхэрэм документхэр арахьылIэнхэ алъэкIыщт, — къыIуагъ КIыкI Зарэ.
КIарэ Фатим.