Программэу «Уры­сыем инеущырэ маф» зыфиIорэм къыдыхэ­лъытагъэу теннис цIы­кIумкIэ Адыгэ Республикэм изэIухыгъэ зэнэкъокъу непэ зэфа­шIыжьыщт.

Анахьыжъхэм якуп хэтхэр ары зызыушэтыщтхэр. КIалэхэм ыкIи пшъашъэхэм яунэе зэнэкъокъу­хэм анахь лъэшхэр къащынэфэщтых. Мыекъуапэ ыкIи Адыгэ­къалэ яспортсмен 30 фэдизмэ Адыгеир къагъэлъагъо.
Зыныбжь илъэс 14-м емыхъугъэхэр мэфитIурэ зэнэкъокъугъэх. Апэрэ мафэм изэфэхьысыжьхэмкIэ, республикэр къэ­зыгъэлъэгъогъэ кIэли 7-рэ пшъэ­шъи 4-рэ текIоныгъэм фэбэнэнхэ амал яIагъ. Анахьэу узщыгугъы­нэу щытыгъэр Мыекъуапэ щыщ Артем Вариводиныр ары, рейтингымкIэ тиспортсмен яплIэнэрэу щытыгъ. Ау финалныкъом ащ къытекIуагъ Невинномысскэ илIыкIоу Дмитрий Назаренкэр, пчъагъэр — 2:3. Ящэнэрэ чIыпIэр къыдихын ылъэкIыщтыгъ, ау Крас­нодар итеннисистэу Дмитрий Веселовыр нахь лъэшыгъ, ащ къыхэкIэу яплIэнэрэ хъугъэ.

Апэрэ ыкIи ятIонэрэ чIыпIэхэр Къырым испортсменхэу Илья Маслийрэ Тимофей Бойкэрэ афагъэшъошагъэх. Пшъа­шъэхэмкIэ текIоныгъэр къыдихыгъ Виктория Сидоровам,
ащ финал ешIэгъур Ставрополь щыщ Виктория Краснощековам къы­шIуихьыгъ. Ростов-на-­Дону щыщ Милана Рябоконь ящэнэрэ хъугъэ.