Адыгеим илIыкIохэр Урысые зэнэкъокъоу «НыдэлъфыбзэмкIэ ыкIи литературэмкIэ анахь кIэлэегъэджэ дэгъу» зыфиIорэм иаужырэ уцугъо хэлэжьэщтых. АР-м гъэсэныгъэмрэ шIэныгъэмрэкIэ и Министерствэ къызэритыгъэмкIэ, ХъокIон Эллэрэ Милана Ермаковамрэ ащ зыкъыщагъэлъэгъощт.

Iофтхьабзэр Бурятием щыкIощт. Ар тIоу гощыгъэщт, ныдэлъфыбзэмкIэ кIэлэегъаджэхэр Iоныгъом и 7-м къыщегъэжьагъэу и 14-м нэс зэнэкъокъущтых, кIэлэпIухэр Iоныгъом и 9-м къыщегъэ­жьагъэу и 14-м нэс. Урысыем ­ишъолъыр 87-мэ къарыкIыгъэ кIэлэегъэджэ нэбгыри 120-рэ ащ хэлэжьэщт. Ныдэлъфыбзэ 38-рэ къагъэлъэгъощт.
Мы илъэсым ныдэлъфыбзэмкIэ анахь кIэлэегъэджэ дэгъу хъугъэр Милана Ермаковар ары. Шэуджэн районымкIэ Краснобашненскэ гурыт еджапIэу N 9-м урысыбзэмрэ литературэмрэкIэ ар икIэ­лэегъадж.
— КIэлэеджакIохэм яныдэлъфыбзэ шIу язгъэлъэгъуныр сипшъэрылъ шъхьаI. Зэнэкъокъум текIоныгъэ къызэрэщыдэсхыгъэм ишIуагъэкIэ аужырэ уцугъом сыхэлэжьэн амал сиIэ хъугъэ. ШIэныгъэу сиIэр къызэрэзгъэлъэгъуагъэм дакIоу сисэнэхьатэгъухэм яIэпэIэсэныгъэ нэрылъэгъу сфэхъугъ. ЫпэкIэ згъэфедэжьын слъэкIыщт лъэныкъохэр сыгу исыубытагъэх. Аужырэ уцугъом Адыгеир зэрифэшъуашэу къызэрэщызгъэлъэгъощтым сишъыпкъэу сыдэлажьэ, — еIо Милана Ермаковам.

КIэлэпIухэмкIэ анахь дэгъоу зыкъэзыгъэлъэгъуагъэр Мыекъопэ кIэлэцIыкIу IыгъыпIэу N 28-м Iоф щызышIэрэ ХъокIон Элл.
ЫгукIэ къыхихыгъэ сэнэхьатым Iоф зыришIэрэр илъэс 15 хъущт. Апэрэ мафэм къыщегъэжьагъэу кIэлэцIыкIухэм адыгабзэр аригъэшIэным ыуж ит. ­Аныбжь елъытыгъэу нахь ашIогъэшIэ­гъоныщт лъэныкъохэр къафыхехых. Адыгэ шэн-хабзэхэм афэгъэхьыгъэ егъэджэн цIыкIухэр афызэхещэх.
Зэнэкъокъум текIоныгъэ къызэрэщыдихыгъэм Эллэ рэгушхо. ИIофшIэнкIэ ащ шIогъэшхо къыхьынэу елъытэ. Ежь фэдэу ныдэлъфыбзэр зыгъэлъапIэу, кIэлэцIыкIухэм аIузылъхьэхэрэм нэIуасэ афэхъугъ, яIэпэIэсэныгъэкIэ зэхъожьыгъэх. Джы аужырэ уцугъом зэрифэшъуа­шэу зыфегъэхьазыры. Апэрэ лъэныкъом шъохэр зэхафышъуным пае егъэджэн сыхьатыр зэрэзэхэпщэн фаер къафигъэ­лъэгъощт. Ащ зыпхырыкIыкIэ, ны-тыхэм афэгъэхьыгъэ Iофтхьабзэ къыгъэлъэ­гъощт. Мастер-классым бзылъфыгъэм иадыгэ шъуашэ идэхагъэ къыщигъэлъэгъощт.
— Адыгабзэм идэхагъэ, ибаигъэ къязгъэлъэгъунэу сыфай. Тиныдэлъфыбзэ инеущырэ мафэ тэры — кIэлэпIухэмрэ кIэлэегъаджэхэмрэ зэлъытыгъэр. Зэнэкъокъум иаужырэ уцугъо къысфэмыгъэсыжьэу сежэ ыкIи гугъэпIэ инхэр фысиIэх, — еIо Эллэ.

«НыдэлъфыбзэмкIэ ыкIи литературэмкIэ анахь кIэлэегъэджэ дэгъу» зыфиIорэ зэнэкъокъур 2022-рэ илъэсым къыщегъэжьагъэу зэхащэ. Урысыем просвещениемкIэ и Министерствэ Iофтхьабзэм кIэщакIо фэхъугъ. Урысые Федерацием щыпсэурэ лъэпкъ зэфэшъхьафхэм яныдэлъфыбзэкIэ Федеральнэ институтыр зэнэкъокъум иоператор.
ДЕЛЭКЪО Анет.
Сурэтхэр: ХъокIон Эллэрэ Милана Ермаковамрэ яхъарзынэщ.