Адыгэ Республикэм и ЛIышъхьэу КъумпIыл Мурат шышъхьэIум и 12-м машIор къыз­кIэ­нэгъэ Мыекъуапэ иурамэу Депутатскэм тет фэтэрыбэу зэхэт унэу N 25-м щыпсэу­хэрэм аIукIагъ.

Шъугу къэдгъэкIыжьын, машIом квад­рат метрэ 900 зэлъикIугъ, ащ игъэкIосэн сыхьатищ ыхьыгъ. Ащ ыуж етIани машIор зэрэщытэу гъэкIосэгъэным къэгъэнэжьакIохэр сыхьати 8-рэ пы­лъыгъэх. Унашъхьэр стыгъэ, ашъхьагъы­рэ къатхэм атет фэтэрипшI пчъагъэмэ зэрар арихыгъ. ОшIэ-дэмышIагъэм цIыф хэкIодагъэп, зыми шъобж тещагъэ хъугъэп.
Фэтэрыбэу зэхэт унэм машIор къызэрэкIэнагъэм икIэуххэм ядэгъэзыжьын зыщатегущыIэгъэхэ зэхэсыгъо респуб­ликэм ипащэ зэхищэгъагъ. Зэтегъэуцо­жьын IофшIэнхэм язэхэщэнрэ цIыфхэм IэпыIэгъу афэхъунхэ зэралъэкIыщт амалхэм ягъэнэфэнрэ анахь шъхьаIэу щытыгъэх.
Тыгъосэрэ зэдэгущыIэгъум хэлэжьагъэх АР-м иминистрэхэм я Кабинет ­и Тхьаматэу КIэрэщэ Анзауррэ ащ игуадзэу Хъоткъо Хъызыррэ, Адыгеим псэолъэшIынымкIэ, транспортымкIэ, псэупIэ-коммунальнэ ыкIи гъогу хъыз­мэтымкIэ иминистрэ иапэрэ гуадзэу Лафышъэ Рэмэзан, республикэм граждан зыухъумэжьынымкIэ ыкIи ошIэ-­дэмышIэ IофхэмкIэ и Комитет итхьаматэу Вячеслав Лотаковыр, программэу «ЛIыхъужъхэм яуахът» зыфиIорэм хэлэжьэрэ Сергей Ковалевыр, Мые­къуапэ имэрэу Геннадий Митрофановыр, нэмыкIхэри.
Мыекъопэ къэлэ администрацием ипащэ къызэриIуагъэмкIэ, машIом зэрарэу къыхьыгъэр гъэунэфыгъэным фэ­гъэзэгъэ комиссием иIофшIэн ­ыухыгъ, джырэ уахътэм актхэр зэхагъэуцох. МашIом ыкIи псым анахьэу зиягъэ якIыгъэ фэтэр 19 агъэунэфыгъ, ахэм ащыщэу 7-р зэрэпсаоу стыгъэх. Псэо­лъэшIхэм унашъхьэр зэпкъырахы.
ЦIыфхэр ыгъэгумэкIыщтыгъэх фэтэрэу къызэтенагъэхэм зыщагъэзэжьын алъэ­кIыщтым. Геннадий Митрофановым зэрэщигъэгъозагъэхэмкIэ, джырэ уахътэм гъэстыныпхъэ шхъуантIэм, псым ыкIи электричествэм ярыкIуапIэхэр зэтырагъэуцожьынхэм Iоф дашIэ. Я 8-рэ ыкIи я 9-рэ къатхэм анэмыкIэу адрэхэм зэкIэми тыгъуасэ псыр къафатIупщыжьыгъ. ЗэрагъэнэфагъэмкIэ, элек­трооборудованиер загъэчъэпхъыкIэ ыкIи ар шапхъэхэм адиштэ зыхъукIэ, мыфыкъогъэ фэтэрхэм непэ электричествэр къаратыжьыщт. Вентиляцием исистемэ фэтэрхэм зэкIэм защауплъэкIукIэ газыри къафатIупщыжьыщт.
— Мы Iофыгъохэм шъунаIэ атежъугъэт. Гъэстыныпхъэ ­шхъуантIэр ыкIи электричествэр хэбгъэнэжьынхэм фэшI щы­нэгъончъэным ишапхъэхэр зэкIэ гъэцэкIэгъэнхэ фае, — къыIуагъ республикэм ипащэ.
Джащ фэдэу яфэтэрхэр ыкIи ­ямылъку зэтегъэуцожьыгъэнхэм фэшI IэпыIэгъоу агъотын алъэкIыщтым цIыфхэр къыкIэупчIагъэх. Шъолъырым ипащэ Мые­къуапэ имэрие пшъэрылъ фишIыгъ зэрарэу ахьыгъэм елъытыгъэу цIыфхэм ахъщэ IэпыIэгъу аратыным иIофыгъо зэхифынэу. КъумпIыл Мурат хэушъхьафыкIыгъэу къыхигъэщыгъ унашъхьэмрэ анахьэу зэрар зыхьыгъэ фэтэрхэмрэ ягъэцэкIэжьын пэIухьащт мылъкур муниципальнэ ыкIи республикэ бюджетхэм къазэрахагъэкIыщтыр. ПIэлъэ гъэ­нэфагъэкIэ нэмыкI чIыпIэхэм агъэко­щыгъэхэм, ахэр нэбгырэ 32-рэ мэхъу, ахъщэ IэпыIэгъу аратыщт.
— ЦIыфхэм щыIэкIэ-псэукIэу яIагъэм хэхьажьынхэм амал зэриIэкIэ псынкIэу Iоф дэтшIэщт. Унашъхьэр зэблэтхъущт, машIом анахьэу зэрар зэрихыгъэ фэтэрхэр дгъэцэкIэжьыщтых. Джащ фэдэу мылъкоу чIанагъэм изэте­гъэуцожьынкIэ зытефэхэрэм ти­шIуагъэ ядгъэкIыщт. Зи гум иты­нэщтэп, — къызэфихьысыжьыгъ Адыгеим и ЛIышъхьэ.