Мыекъуапэ щэкIо
УФ-м теннис цIыкIумкIэ и Федерацие ипрограммэу «Урысыем инеущырэ маф» зыфиIорэм къыдыхэлъытэгъэ зэнэкъокъухэр Мыекъуапэ щэкIох.
Адыгэ Республикэм изэIухыгъэ первенствэ тишъолъыр имызакъоу, Краснодар ыкIи Ставрополь крайхэм, Ростов хэкум, Донецкэ ыкIи Луганскэ народнэ республикэхэм, Къырым ялIыкIохэр хэлажьэх.
Зыныбжь илъэс 14-м емыхъугъэхэм яфинал зэIукIэгъухэр непэ щыIэщтых, джащ фэдэу нэбгырэ тIурытIу хъухэрэ хъулъфыгъэхэм, бзылъфыгъэхэм ыкIи зэхэпхъагъэхэм язэнэкъокъу рагъэкIокIыщт.
Зыныбжь илъэс 12-м шIомыкIыгъэхэм якуп текIоныгъэр ыкIи хагъэунэфыкIырэ чIыпIэхэр къыщыдэзыхыгъэхэр къэнэфагъэх. ЗэкIэми анахь лъэшыгъэх Невинномысскэ щыщ Дмитрий Назаренкэмрэ Ставрополь къэзыгъэлъэгъогъэ Мария Платоновамрэ. Адыгеим испортсменхэу къэгъэлъэгъон анахь дэгъу зиIэхэр яблэнэрэ чIыпIэр къыдэзыхыгъэ Ирина Славновамрэ япшIэнэрэ хъугъэ Бзаго Дамиррэ.
Зыныбжь илъэс 18-м нэмысыгъэхэм язэнэкъокъу шэмбэтым зэхащэщт. Iофтхьабзэр Адыгэ къэралыгъо университетым и Ордэунэу Кобл Якъубэ ыцIэ зыхьырэм щэкIо.