Адыгеим и ЛIышъхьэу КъумпIыл Мурат зэрищэгъэ зэIукIэр зыфэ­гъэхьыгъагъэр къалэу Мыекъуапэ иурамэу Депутатскэм тет фэтэрыбэу зэхэт унэу N 25-м иунашъхьэрэ ышъхьагъырэ къатхэмрэ мэшIошхо къызэракIэнэгъагъэм икIэуххэм ядэгъэзыжьын ары.

ЗэIукIэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, Мыекъуапэ имэрэу Геннадий Митрофановыр, Урысыем ошIэ-дэмышIэ IофхэмкIэ и Министерствэ и ГъэIорышIапIэу Адыгеим щыIэм ипащэу Станислав Илющенкэр, министерствэ ыкIи къулыкъу зэфэшъхьафхэм яIэ­шъхьэтетхэр.
ЗэIукIэгъур къызэIуихызэ республикэм и ЛIышъхьэ къыIуагъ ошIэ-дэмышIагъэ зыхэлъ тхьамыкIагъом икIэуххэм ядэ­гъэзыжьынкIэ къулыкъу зэфэшъхьафхэм зэдегъэштэныгъэ ахэлъэу япшъэрылъхэр зэрагъэцэкIагъэхэм пае зэрафэразэр. ЦIыфхэр псынкIэу агъэкощыгъэх, гумэкIыгъор къызэрытэджэгъэ чIыпIэм штаб къыщызэIуахыгъ, цIыфхэм ямылъку къау­хъумагъ, зэрар зыхьыгъэ фэтэрхэм ачIэсхэр пIэлъэ гъэнэфагъэкIэ зыдащэщтхэ чIыпIэр къагъэхьазырыгъ.
ГъэIорышIапIэм ипащэу Станислав Илющенкэм къызэриIотагъэмкIэ, пчыхьэм сыхьатыр 8-м такъикъи 4-кIэ хэхьагъэу дежурнэхэм макъэ къарагъэIугъ машIом зыкъызэриштагъэмкIэ. Такъикъи 3-кIэ мэшIогъэкIуасэхэм яапэрэ подразделениехэр а чIыпIэм къэсыгъэх. Iугъом зэ­лъиштэгъэ шъолъырым нэбгыритIу къы­хахыжьыгъ, адрэхэм ежь-ежьырэу яфэтэрхэр къабгынагъэх. МэшIогъэкIуа­сэхэм кIэшIэгъэ дэкIояпIэхэр къызфа­гъэфедэхэзэ, чIыпIи 4-мэ Iоф ащашIагъ.Квадрат метрэ 900-м чэщым сыхьатыр 11-м такъикъи 10-кIэ ежьагъэу машIор щагъэкIосэн алъэкIыгъ.
Унашъхьэр машIом ыстыгъ. ПэшIорыгъэшъэу къызэрэрадзагъэмкIэ, фэтэр 30 фэдизмэ зэрар арихыгъ, ахэр ышъхьа­гъы­рэ къатхэр ары нахьыбэмкIэ зытетыгъэхэр. Зыпари хэкIодагъэп, фыкъуагъэп. Пчэдыжьым сыхьатыр 6-м чIыпIэ пстэуми машIор ащагъэкIосагъ. ПэшIорыгъэшъэу зэренэгуехэрэмкIэ, тутын ешъохэрэм ащыщ горэм машIом епхыгъэу сакъыныгъэ къызхигъэ­фагъэп. Лабораторием иIофышIэхэм а чIыпIэм уплъэкIун Iофтхьабзэхэр щызэрахьэх, нэ­ужым кIэух зэфэхьысыжьхэр ашIыщтых.

Мыекъуапэ имэрэу Геннадий Митрофа­новым къызэриIуагъэмкIэ, унэм фэтэр 94-рэ хэт, пстэумкIи нэбгыри 140-рэ фэдиз ахэм ащэпсэу. Чэщым нэбгырэ 15-мэ пIэлъэ гъэнэфагъэкIэ зычIэсыщтхэ чIыпIэ­хэу къалэм ихьакIэщхэм къа­щыфыха­гъэ­кIыгъэхэм кIохэмэ зэрашIои­гъор къа­­Iуагъ. Ашхыщтыри, ящыкIэгъэщт пкъыгъохэри аIэкIагъэ­хьагъ.
КъумпIыл Мурат пшъэдэкIыжь зыхьырэ къулыкъу пстэуми пшъэрылъ афи­шIыгъ зычIэсынхэ унэ зимыIэу къэнагъэхэм япхыгъэ IофшIэным къыхэлэжьэнхэу.
«ЦIыфхэм къатеогъэ къиныр адэтIэтыщт — унашъхьэр афэдгъэцэкIэжьыщт, зэрар зыхьыгъэхэм тадеIэщт. Къулыкъу комиссием зэрарэу ахьыгъэр зыфэдизыр псынкIэу къыридзэн фае. Ащ нэужым IофшIэнхэм апэIухьащт ахъщэр къызди­­кIыщтыр дгъэнэфэщт, пIэлъэ кIэкIым къы­кIоцI унашъхьэмрэ унэм щыпсэухэрэм зэдыряе мылъкумрэ дгъэцэкIэжьыщтых. Подрядчикым икъыхэхын шъунаIэ тежъу­гъэт, IофшIэнхэр амал зэриIэкIэ нахь псын­кIэу зэрэзэшIуахыщтхэм имызакъоу, дэгъоу ахэр гъэцэкIэгъэнхэм шъунаIэ тежъугъэт», — къыIуагъ ЛIы­шъхьэм.
МашIомрэ псымрэ зэрар зэрахыгъэ фэтэрхэр зиунаехэм IэпыIэгъоу аратын алъэкIыщтымкIэ амалэу щыIэр зыфэдэр агъэунэфынэу республикэм и ЛIышъхьэ пшъэрылъ афишIыгъ.
Комиссием зэрар зыхьыгъэ унэм Iоф­шIэнхэр щылъегъэкIуатэх. МашIом зэра­рэу къафихьыгъэр специалистхэм къырадзэщт ыкIи цIыфхэм япсэупIэхэм нахь псынкIэу къагъэзэжьынхэм пае зэщымыкъогъэ, зэрар зымыхьыгъэ фэтэр­хэр газымрэ электричествэмрэ апышIэгъэнхэмкIэ амалэу щыIэхэм яусэщтых.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.