Адыгэ Республикэм и ЛIышъхьэу КъумпIыл Мурат иунашъокIэ зэхэщэгъэ оперативнэ штабым хэтхэм тхьамыкIагъом идэгъэзыжьын епхы­гъэу игъэкIотыгъэу Iоф ашIэ.

Мыекъопэ къэлэ админист­рацием ипащэу Геннадий Мит­рофановыр, къэралыгъо хабзэм ишъолъыр ыкIи имуни­ципальнэ къулыкъухэм япащэхэр ЛIышъхьэм къафигъэнэ­фэгъэ пшъэрылъхэм язэшIохын ыуж ихьагъэх.
МашIор къызэгоогъэ фэтэр­хэм ыкIи фэтэрыбэ хъурэ унашъ­хьэм язытет джыри ауплъэкIу. Мыекъопэ къэлэ администрацием, псэупIэ-коммунальнэ хъызмэтым, Адыгэ Республикэм псэупIэхэмкIэ иин­спекцие, псэолъэшI орга­низациехэм яушэтакIохэм ма­шIом къыхьыгъэ зэрарыр зы­фэдизыр джыри агъэунэфы.

Унашъхьэм игъэцэкIэжьын зэшIозыхыщт хэушъхьафыкIыгъэ псэолъэшI организацием зэзэгъыныгъэу дашIыгъэмкIэ шышъхьэIум и 14-м IофшIэнхэр рагъэжьэщтых.
МашIор зыпкъ къикIыгъэм ыкIи къызщежьагъэм фэгъэ­хьыгъэу хэушъхьафыкIыгъэ ла­бораторием хьыкум мэшIогъэ­кIосэ-техническэ экспертизэр зэхищагъ.
— УплъэкIунхэр лъэныкъуитIумкIэ макIох. Зы комиссием хэхьагъэх Мыекъопэ къэлэ администрацием, Газпромым, псэупIэхэмкIэ инспекцием, псым ыкIи электроэнергием якъэкIуапIэхэм алъыплъэрэ хъызмэтшIапIэхэм яIофышIэхэр. Ышъхьагъырэ къатхэм атет фэтэрхэр ахэм къаплъыхьэх, зэфэхьысыжьэу ашIыхэрэр Адыгэ Республикэм и ЛIышъхьэ рахьылIэщтых. ЯтIонэрэ комиссием Газпромым иIофы­шIэхэмрэ унэм жьыр къызэ­рэщырекIокIырэ коммуникациехэм алъыплъэрэ ушэтакIохэмрэ хэхьэх. КIэух зэфэхьысыжьхэр чэщ-зымафэм къыкIоцI тшIыщтых, игъэкIотыгъэ Iоф­шIэнхэр тыублэщтых, — къыщиIуагъ Мыекъопэ къэлэ ад­министрацием ипащэу Геннадий Митрофановым и Телеграм-канал.
Медицинэ IэпыIэгъу псынкIэм и Адыгэ республикэ станциерэ тхьамыкIагъохэм ахэфагъэхэм медицинэ IэпыIэгъу ятыгъэнымкIэ и Гупчэрэ яврач шъхьаIэу Сихъу Ахьмэд къызэриIуагъэмкIэ, машIор къызщыхъугъэ чIыпIэм IэпыIэгъу псынкIэм ибригадищ Iоф щашIагъ. МашIом зыми зэрар рихыгъэп, лъыдэ­кIуае яIэу медицинэм иIофы­шIэхэм нэбгыритIу къяолIагъ. МэшIогъэкIосэ къулыкъум иIофышIэу зылъакъо шъобж фэ­хъугъэр Адыгэ Республикэм исымэджэщ ащагъ. МашIор агъэ­кIосэфэ медицинэм иIофы­шIэхэм чIыпIэм Iоф щашIагъ.