ЗыкI къэралыгъо ушэтынхэмкIэ анахь балл инхэр къизыхыгъэ ныбжьыкIэхэм ащыщхэу апшъэрэ еджэпIэ анахь дэгъухэм ачIэхьагъэхэм непэ ягугъу къэтшIыщт.

УрысыбзэмкIэ ыкIи физикэмкIэ балли 100 къизыхыгъэ Александр Мусиным къэбар гушIуагъо мы мафэхэм къы­Iуагъ. Мыекъопэ лицееу N 34-р къэзыухыгъэ кIалэр экономикэмкIэ Апшъэрэ еджапIэм физикэмкIэ ифакультет чIэхьагъ.
Александр шIэныгъэм ылъэныкъокIэ гъэхъагъэхэр ышIынхэу сыдигъокIи фэягъ. ИгъэкIотыгъэу физикэр, хьисапыр ыкIи нэмыкI шIэныгъэхэр зэригъэгъо­тыщтыгъэх. Мафэ къэс темэ анахь къинхэм язэгъэшIэн сыхьат пчъагъэ пигъэкIуадэщтыгъ, задачэ анахь къинхэр къышIынхэм ыуж итыгъ, зэригъэшIэрэ предметыр нахь къыгурыIоным пае материал тедзэхэр къызфигъэфедэщтыгъэх. Зэпымыоу Iоф зэрэзыдишIэжьырэм ишIуагъэкIэ къин къыфэмыхъоу зыкI къэралыгъо ушэтынхэр дэгъу дэдэу ытыгъэх ыкIи ыгукIэ къыхихыгъэ апшъэ­рэ еджапIэм чIэхьагъ.
КIэлэ ныбжьыкIэм игъэхъагъэхэмкIэ илэгъухэм ящысэтехыпI. Дэгъоу уеджэмэ, дунаим тет апшъэрэ еджэпIэ анахь дэгъухэм уачIэхьан зэрэплъэкIыщтыр джыри зэ къаригъэлъэгъугъ.

— Зызыфэзгъэзэщт лъэныкъом бэрэ сегупшысыгъ. Физикэр нахь игъэкIотыгъэу зэзгъэшIэнэу экономикэмкIэ Апшъэрэ еджапIэм сычIэхьагъ. СызэрэчIэфагъэр къызысаIом, лъэшэу сигуапэ хъугъэ. СыгукIэ сызыфэщэгъэ предметыр джыри нахь игъэкIотыгъэу зэзгъэшIэн амал сиIэ хъугъэ, — еIо Александр.
Андрей Ткачевым Мыекъопэ лицееу N 19-р къыухыгъ. Дзэ-ошъогу академиеу профессорэу Н.Е. Жуковскэм ыкIи Ю.А. Гагариным ацIэ зыхьырэм чIэхьагъ. Ар къалэу Воронеж дэт.
Андрей илэгъухэм сыдигъокIи къахэщыщтыгъ. Анахь шIэныгъэ дэгъу зиIэ кIэлэеджакIохэм ащыщыгъ, мафэ къэс кIэ горэ зэригъэшIэным, гъэхъагъэхэр ышIыным дэлэжьагъ.
КIэлэ ныбжьыкIэр еджэным имыза­къоу, патриотическэ Iофтхьабзэхэм чанэу ахэлэжьагъ. Юнармейцэ чанхэм ясатырэ хэтэу къыхьыгъ.
— Къэбар гушIуагъэу къэкIуагъэмкIэ сигуапэу сыжъудэгуащэ сшIоигъу. Дзэ-ошъогу академием сычIэфагъ. Ащ бэрэ сыфэкIуагъ. Тренировкэу сшIыгъэхэм, ушэтынхэм зызэрафэзгъэхьазырыгъэм ыкIи балл инхэр къызэрэсхьыгъэм язэфэхьысыжь къэслъэгъугъ. СызыкIэхъопсыщтыгъэ сэнэхьатыр зэзгъэгъотын амал сиIэ хъугъэ. Анахь мэхьанэшхо зиIэ сэнэхьатхэм ащыщ зэрэзэзгъэгъотыщтым сыкIэгушIу. Къысфэмыгъэсыжьэу еджэгъу илъэсым сежэ, шIэныгъакIэхэр зэзгъэгъотыным сыфэхьазыр. КъысфэгумэкIыгъэхэу, къыскъотыгъэхэм зэкIэми сызэрафэразэр ясэIо, — къыIуагъ Андрей.

Мыекъуапэ дэт лицееу N 19-р къэзыухыгъэ, урысыбзэмкIэ балли 100 къэзыхьыгъэ Яна Исущевар Пшызэ къэралыгъо мэкъумэщ университетым чIэхьагъ. ЗыкI къэралыгъо ушэтынхэр дэгъоу зэритыгъэхэм ишIуагъэкIэ ушэтынхэр ымытыхэу мы апшъэрэ еджапIэм пшъэшъэжъыер чIэхьагъ.
Пшызэ къэралыгъо мэкъумэщ университетэу И.Т. Трубилиным ыцIэ зыхьырэр мэкъумэщ шIэныгъэм ылъэныкъокIэ анахь апшъэрэ еджэпIэ дэгъу­хэм ащыщ. Урысыем иэкономикэ ыкIи мэкъу-мэщым хэхъоныгъэхэр ашIынхэм ащ иIахьышIу хэлъ.

— ЫпэрапшIэу псэолъэшIыным епхыгъэ факультетым сычIэхьанэу сыфэягъ, ау апшъэрэ еджапIэм сызэкIом, лъэныкъоу зызыфэзгъэзэщтыр къыхэсхыгъ. Уц шхъонтIэ дахэ ыкIи чIыг зэфэшъхьафхэр къызыщыкIырэ чIыпIэм ар дэт, анахь шъхьаIэр — гупсэфыныгъэу чIэлъыр зэхэсшIагъ. Мы апшъэрэ еджапIэм шIэныгъэ зэрэщызгъотыщтым дакIоу еджэным гухахъо хэзгъотэнэу сэгугъэ, — еIо Янэ.
Мыпшъыжьэу ишIэныгъэхэм зэрахигъэхъуагъэм ишIуагъэкIэ игухэлъхэр пшъэшъэжъыем къыдэхъугъэх. Узыдэлэжьэжьымэ, узыфаер къызэрэбдэхъущтымкIэ пшъэшъэжъыер щысэтехыпI.
ЛIыIужъу Айтэч Мыекъопэ лицееу ­
N 19-р къыухыгъ, экономикэмкIэ Апшъэ­рэ еджапIэм чIэхьагъ. ХьисапымкIэ зыкI къэралыгъо ушэтыныр кIитыкIыжьи, балли 100 къыхьыгъ. НэмыкI предметхэмкIи къэгъэлъэгъон дэгъухэр иIэх, урысыбзэмкIэ балл 94-рэ, информатикэмкIэ — 93-рэ къырихыгъ. А къэ­гъэлъэгъонхэм яшIуагъэкIэ зэнэкъо­къушхо зиIэгъэ апшъэрэ еджапIэм Айтэч чIэхьагъ.

— ЭкономикэмкIэ Апшъэрэ еджапIэм сычIэхьаныр сипшъэрылъ шъхьаIэу зыфэзгъэуцужьыгъагъ. ЗыкI къэралыгъо ушэтынхэм зэрифэшъуашэу зафэзгъэхьазырыгъ, балл дэгъухэр зэрэсиIэм ишIуагъэкIэ сигухэлъ къыздэхъугъ, бюджет шIыкIэм тетэу седжэн амал сиI. Ар гъэхъагъэхэм япэублэу сэлъытэ, джы апшъэрэ еджапIэм дэгъоу ущеджэн фае. ИлъэсыкIэ еджэгъур къысфэмыгъэсыжьэу сежэ, — еIо Айтеч
Зыгъэхьазырыгъэр
ДЕЛЭКЪО
Анет.
Сурэтхэр: АР-м гъэсэныгъэмрэ шIэныгъэмрэкIэ и Министерств.