Народнэ фронтым илIыкIохэу, автомобилэу баггыр къэзыугупшысыгъэ Эдуард Мымринымрэ актерэу Иван Охлобыстинымрэ дзэ медикэу уIэгъэ дзэкIолI 1000-м ехъу зэо чIыпIэм къизыщыжьыгъэм баггыр (гъогу хьылъэхэм ащызекIошъурэ автомобилыр) ратыгъ.

Арслан мыщ зэрэщеджэхэрэр “Кэп”– зэо чIыпIэм уIагъэхэр къизыщыжьырэ купым икомандир, 2023-рэ илъэсым къыщыублагъэу хэушъхьафыкIыгъэ дзэ операцием хэлажьэ. Ишъхьэгъусэ дзэ медикэу зэрэщытым къыхэкIэу дзэ операцием къеджагъэх , ащ ыуж итэу ежьыри фронтым кIуагъэ. Къулыкъум зыщыIэм иятIонэрэ мафэ “Кэп” дзэкIолIэу къауIагъэр зэо чIыпIэм къырищыжьын ылъэкIыгъ. Ащ подразделением икомандир гу къылъитагъ ыкIи сварщикэу ыпэкIэ щытыгъэр уIагъэхэр къыхэзыщыжьырэ купым хигъэхьагъ. Ащ къыщегъэжьагъэу “Кэп” нэбгырэ 1000 псаоу къыгъэнэжьыгъ, ары пэпчъ «сикъош­кIэ» ахэм яджэ.
Московскэ госпитальхэм ащыщ непэ “Кэп” зыщегъэхъужьы, яблэнэрэу къызауIэм ыуж ащ чIэфэнэу хъугъэ. Дзэ медикыр хэушъхьафыкIыгъэ дзэ операциер зыщыкIорэ шъолъырым къызикIыгъэр апэрэ. Яблэнэрэ уIагъэр нахь хьылъэу къычIэкIыгъ – ылъакъо чIыпIитIумэ щэр къатефагъ, Арслан псаоу къызэрэнэжьыгъэр къыгурыIорэп, «баг­гыр» зэрэпсаоу стыгъэ.
“Сэ ащ фэдэ машиниплI сиIагъ, зэкIэри стыгъэх. Апэрэр разведкэм тыкIозэ лагъымэу тызытехьагъэм къыгъэуагъ, ятIонэрэм дроныр къеуагъ. Адрэхэр – е минометым тефагъэх, е щэмэ зэбгыраутыгъэх”, – къыIотагъ уIагъэхэр къыхэзыщыжьырэ бригадэм икомандирэу “Кэп”.
ЗэлъашIэгъэ командирым икъэбар щыгъозагъэх, ащ къыхэкIэу Народнэ фронтым унашъо ышIыгъ уIагъэхэр къы­зэрэхищыжьыщтхэ автомобилыкIэ ащ ратынэу. Баггым имоделэу “Маламут” зыфиIорэм иIункIыбзэхэр Арслан езытыгъэхэр а автомобилыр къэзыугупшысыгъэ Эдуард Мымринымрэ актерэу ыкIи Путиным икомандэ хэт Иван Охлобыстинымрэ. Артистым къызэрэхигъэ­щыгъэмкIэ, дзэ врачхэр – хэушъхьафыкIыгъэ цIыфых, якъэбар зэхихыгъэ къо­дыеу щытэп, актерым ятэ дзэ врач.
“ТицIыф лъапI, Тхьэм укъеухъум! Зыгорэм мы уимашинэ ищыIэныгъэ къыгъэнэжьыщт. ХэушъхьафыкIыгъэ дзэ операцием хэлэжьэрэ тидзэкIолIмэ анахь шъхьаIэ джырэкIэ зи щыIэп. Анахь мэхьанэ зиIэ хъугъэ-шIэгъэшхохэр а чIыпIэр ары зыщыхъухэрэр, ащ илъэсишъэ пчъа­гъэхэм ателъытэгъэ тарихъыр щатхы”, – къыIуагъ Иван Охлобыстиным, баггым иIункIыбзэхэр командирым ритыжьхэзэ.
ХэушъхьафыкIыгъэ дзэ операцием фытегъэпсыхьагъэу баггыр Эдуард Мымриным ышIыгъ, ащкIэ Арсен заом кIожьыщт.
«ЗэкIэ текIоныгъэм пай» зыфиIорэ шIушIэ фондыр Народнэ фронтым зызэхищагъэр илъэситIу хъугъэ. Ащ ишIуа­гъэкIэ дзэ медикхэм ящыкIэгъэ Iэмэ-псымэхэр ыкIи техникэр аIэкIагъа­хьэ. А уахътэм къыкIоцI сомэ миллион 560-рэ къаугъоигъ, уIагъэхэр зэо чIыпIэм къизыщыжьын зылъэкIыщт автомобили 180-рэ ащэфыгъ, мототехникэу 100-м ехъу – ахэр баггых, квадроциклэх, мотоциклэхэу прицепхэр зыпытхэр, нэ­мыкIыбэр.
Непи мэугъуаех, шъори ащ шъукъыхэ­лажьэх. Народнэ фронтым и «Дзэ медикхэм» ясайтэу “Все для Победы!” зыфиIорэм шъухахьэмэ, ащ шъузэрэхэлэжьэщт шIыкIэм зыщыжъу­гъэгъозэн шъулъэкIыщт. Къаугъоирэ ахъщэмкIэ ыпэкIэ зигугъу къэт­шIыгъэ медицинэ Iэмэ-псымэхэм афэдэхэр ащэфыщтых, хэушъхьафыкIыгъэ дзэ операциер зыщыкIорэ шъолъырым агъэхьыщтых.
“Ащ умыкIомэ – зи къыхэпщыжьы­шъущтэп. УкIуагъэп ныIа, зыгорэмэ анэпс къехыщт, ахэр е ны-тых, е шъхьэгъусэх, е сабыих. Джащ пае ренэу ахэм салъэкIо, зыпари мыгъыжьыным фэшI. Тылым щыIэ тифронт, зэкIэ гражданскэхэу къыддэIэпыIэхэрэм тафэраз. ШъушIошъ жъугъэхъу, шъуитхыгъэхэу къытIукIэхэрэми шоколад плиткэ цIыкIухэми тэркIэ мэхьанэшхо яI. Донецкэ лъэныкъом щыIэхэм ыкIи нэмыкI дзэкIолIхэм ацIэкIэ «тхьашъуе­гъэпсэу!» шъосэIо. ТекIоныгъэр тэ тигъусэщт!» – къыIуагъ уIагъэхэр къы­хэзыщыжьырэ бригадэм икомандирэу “Кэп”.