БзэджэшIагъэ къыжъудызэрахьагъэмэ, полицием зызэрэфэжъугъэзэщтыр
Шъуифитыныгъэхэр аукъуагъэхэу шъулъытэмэ, псынкIэу полицием макъэ ежъугъэIу. БзэджэшIагъэ е административнэ хэукъоныгъэ къыбдызэрахьагъэу щытмэ, сыд фэдэрэ уахъти АР-м хэгъэгу кIоцI IофхэмкIэ и Министерствэ е къулыкъум ичIыпIэ отделхэм, министерствэм иофициальнэ сайтхэм ыкIи полицием ителефон номерэу 02-м (мобильнэ номерэу 102-м) лъэIу тхылъкIэ зафэбгъэзэн плъэкIыщт.
Бэ тешъумыгъашIэу полицием макъэ ежъугъэIумэ, бзэджашIэр нахь псынкIэу къаубытын алъэкIыщт. ШъулъэкъуацIэ, шъуцIэ, шъуятэ ыцIэ ыкIи шъузщыпсэурэ чIыпIэр яшъуIу. Хъугъэ-шIагъэр зыщыхъугъэ чIыпIэм шъуIумыкIыжьэу полицием икъулыкъушIэхэр къэкIофэхэ шъуяж.
ИгъэкIотыгъэу ыкIи шъыпкъагъэ хэлъэу зэкIэ къышъущышIыгъэр къулыкъушIэхэм яшъуIу. Нахьыбэ шъугу къэкIыжьэу афэшъуIуатэ къэс, бзэджашIэр нахь къэубытыгъошIу афэхъущт. Зыщышъумыгъэгъупш, лажьэ зэрахыгъэм полицием макъэ зыримыгъэIукIэ, бзэджашIэм пшъэдэкIыжь ымыхьэу хэтыщт.
Хэбзэукъоныгъэ зышIагъэм итеплъэ, ищыгъын, ицуакъэ зыфэдэм (жакIэ, пакIэ тетмэ, ыкIышъо сурэт хэутыгъэ тешIыхьагъэмэ) шъунаIэ атешъудз. БзэджэшIагъэр зылъэгъугъэм шъуелъэIуи, полициер къэкIофэ IушъумыгъэкIыжь. Яжэн ымылъэкIыщтмэ, ителефон номер, зыщыпсэурэ чIыпIэр къежъугъаIу.
Тхыгъэ е жэрыIо шIыкIэм тетэу дежурнэ частым зыфэжъугъэзэн шъулъэкIыщт. Ар къулыкъушIэхэм атхыщт ыкIи талон къышъуфыратхыкIыщт. Нэужым хъугъэ-шIагъэм епхыгъэу упчIэхэр къышъуатыщтых.
Ащ нэмыкIэу общественнэ рэхьатныгъэм икъэухъумэнкIэ полицием иучастковэ пунктэу къышъупэгъунэгъум зыфэжъугъэзэн шъулъэкIыщт.
БзэджэшIагъэ е хъугъэ-шIагъэ горэ шъулъэгъугъэмэ е шъо шъушъхьэкIэ хэбзэукъоныгъэ къыжъудызэрахьагъэмэ, Адыгэ Республикэм хэгъэгу кIоцI IофхэмкIэ и Министерствэ макъэ ежъугъэIунэу зыкъышъуфегъазэ. Ар шIыкIэ зэфэшъхьафхэмкIэ пшIын плъэкIыщт.
Тхьапэм тептхэрэм итынхэ фаехэр:
- Хэгъэгу кIоцI IофхэмкIэ къулыкъоу е ащ Iоф щызышIэу зызыфэбгъазэрэм ыцI, IэнатIэу ыIыгъыр.
- Зафэзыгъазэрэм ылъэкъуацI, ыцI, ятэ ыцI.
- Джэуапыр зыдагъэхьыжьыщт адресыр.
- Ежь ышъхьэкIэ зэрэкIэтхэжьыгъэр ыкIи мафэу зитхыгъэр.
- ЦIыфым ытхыгъэр къэзыгъэшъыпкъэжьырэ документхэр.