Урысыем хэгъэгу кIоцI IофхэмкIэ и Министерствэ иотделэу Джэджэ районым щыIэм икъулыкъушIэхэм оперативнэ-лъыхъун Iофтхьабзэу зэрахьагъэхэм къакIэлъыкIоу мыщ щыпсэурэ илъэс 26-рэ зыныбжь кIалэр наркотикым зэрэпыщагъэм фэгъэхьыгъэ къэбар къыIэкIэхьагъ.

ХэбзэухъумакIохэм зэрагъэунэфыгъэм­кIэ, наркотик зыхэлъ къэкIыхэрэр кIалэм иунэ щигъэбылъын гухэлъ иIагъ. Ащ къыхэкIэу бзэджашIэм икъэубытынкIэ полицием икъулыкъушIэхэм Iофтхьэбзэ гъэнэфагъэхэр зэрахьагъэх. КIалэр зэрысыгъэ автомобилым къулыкъушIэхэр лъыплъэхэзэ, Джэджэ районым ипсэупIэ горэм къыщагъэуцугъ. Машинэр къызалъыхъум, наркотик зыхэлъ вещест­вохэр къэмланхэм щыхьагъэу арылъхэу къырагъотагъ.
АР-м хэгъэгу кIоцI IофхэмкIэ и Министерствэ иэксперт-криминалистхэм зэрагъэунэфыгъэмкIэ, грамм 265-м ехъоу къыIахыгъэр кIэпэу къычIэкIыгъ. Мы мафэм хъулъфыгъэм ылъэныкъокIэ полицием иследовательхэм уголовнэ Iоф къызэIуахыгъ. БзэджашIэм илъэси 10-м нэс хьапс тыралъхьан алъэкIыщт.