ФутболымкIэ Урысыем изэнэкъокъу иятIонэрэ лигэ икупэу «Б-м» хэт «Зэкъошныгъэм» мы спорт лъэпкъыр зыгу рихьэу республикэм щыпсэухэрэр ыгъэгушIуагъэх, я 21-рэ турым къыдыхэлъытэгъэ ешIэгъоу Ялтэ щыриIагъэм текIоныгъэр къыщыдихыгъ.

«Рубин Ялта» — «Зэкъошныгъ» — 0:2 (0:0).
Къэлапчъэм Iэгуаор дэзы­дзагъэхэр: Т. Хьэхыр — я 50-рэ такъикъым, Е. Рагулькиныр — я 78-рэ такъикъым.
«Рубин Ялта» хэтыгъэх:
А. Дьячковыр (къэлэпчъэIут), А. Марченкэр, А. Устиновыр, Г. Шульга, М. Тарасенкэр,
Я. Балан (Н. Болговыр), А. Наниевыр, Н. Панамаревыр (И. Глебовыр), С. Папазян (А. Колтаковыр), Д. Полях (И. Ромащук), В. Пурак.
Тренер шъхьаIэр – А. Грачевыр.
«Зэкъошныгъэм» щешIагъэх: Т. Хачировыр (къэлэпчъэIут), У. Магомедбековыр, С. Черджиевыр, Р. Трефиловыр, К. Юшко (Д. Ширковскэр), К. Антонец, Э. Цанава, З. Коблыр (А. Малкандуевыр), Г. Абдуллаевыр (Т. Хьэхыр), Е. Рагулькиныр (Т. Мохбалиевыр), А. Делэкъор (Д. Антоненкэр).
Тренер шъхьаIэр — С. Мирошниченкэр.
Апэрэ чIыпIихым афэбэнэным фэшI мы зэIукIэгъум тикомандэкIэ мэхьанэшхо иIагъ. «Зэкъошны­гъэм» блэкIыгъэ туритIум ешIэгъоу ащыриIагъэхэм пчъагъэр зэфэдизэу ащиухыгъ. Командэм фэгумэкIыхэрэр текIоныгъэм ежагъэх, сыда пIомэ, мы аужырэ уахътэм «Рубин Ялта» ешIакIэу къыгъэлъагъорэр зыпкъ итэп. ЗэIукIэгъум иапэрэ кIэлъэныкъо командэхэм къэлапчъэм Iэгуаор дадзэн алъэкIыгъэп. ЯтIонэрэм ешIапIэм къихьагъ ыкIи дэгъу дэдэу зыкъыгъэлъэгъуагъ Кощ­хьэблэ районым щыщ футболист ныбжьыкIэу Хьэх Тамирлан. Я 50-рэ такъикъым бысымхэм яухъу­макIо тифутболист IэкIэкIи къэлапчъэм дэуагъ, пчъагъэр къызэIуихыгъ. Я 78-рэ такъикъым Евгений Рагулькиным ащ хигъэ­хъуагъ, 2:0-у зэIукIэгъур аухыгъ, «Зэкъошныгъэм» текIоныгъэр къыдихыгъ.
— Апэрэ ешIэгъуныкъом ыуж командэм хэтхэм садэгущыIагъ ыкIи ясIуагъэр зэкIэ агу раубытагъ. ЯтIонэрэ таймым сэ ­сызфэегъэ ешIакIэр къагъэлъэ­гъуагъ. Къэлапчъэм Iэгуаор дэтыдзэнымкIэ амылыбэ тиIагъ, ау зэкIэри дгъэфедэн тлъэкIыгъэп. Ау анахь мэхьанэ зиIэр текIоныгъэр къызэрэдэтхыгъэр ары, — къыIуагъ «Зэкъошныгъэм» итренер шъхьаIэу Сергей Мирошниченкэм.
Я 21-рэ турым изэфэхьысыжьхэмкIэ, хьэкIэ командэхэм ащыщэу текIоныгъэр къыдэзыхын зылъэкIыгъэ закъор «Зэкъошныгъэр» ары. Астрахань щыкIогъэ зэIукIэгъур пчъагъэр зэфэдизэу аухыгъ. Адрэхэм зэкIэми бысымхэр нахь ащылъэшыгъэх.
Я 21-рэ турым изэфэхьысыжьхэр:
«Ангушт» — «Шъачэ-2» — 2:0, «Астрахань» — «Севастополь» — 1:1, «Легион» — «Спартак-Налщык» — 1:0, «Кубань Холдинг» — «Динамо-2» — 2:0, «Ростов-2» — «Нарт» — 1:0, «Динамо Ставрополь» — «Победа» — 2:0.
Джырэ уахътэм турнир таблицэм «Динамо Ставрополь» пэрытныгъэр щиIыгъ, «Победэм» ятIонэрэ чIыпIэр еубыты, «Севастополь» ящэнэр. «Зэкъошны­гъэр» нахь къыдэкIоягъ ыкIи я 7-рэ хъугъэ. Зичэзыу ешIэгъур тикомандэ шышъхьэIум и 16-м пчыхьэм сыхьытыр 7-м Мыекъуа­пэ щыриIэщт, «Ростов-2-р» тихьакIэщт.
Командэхэр зыдэщыт чIыпIэхэр ыкIи очко пчъагъэу рагъэ­къугъэр:

1. «Динамо Ставрополь» — 41.
2. «Победа» – 41.
3. «Севастополь» — 40.
4. «Кубань Холдинг» — 39.
5. «Ростов-2» — 37.
6. «Астрахань» — 30.
7. «Зэкъошныгъ» — 30.
8. «Нарт» – 29.
9. «Шъачэ-2» — 28.
10. «Легион» — 27.
11. «Рубин Ялта» — 25.
12. «Ангушт» — 17.
13. «Спартак-Налщык» — 14.
14. «Динамо-2» — 2.