Урысые Iофтхьабзэу «Кросс нации» зыфиIорэм хэлажьэ зышIоигъохэм ятхын рагъэжьагъ. Хэгъэгу зэошхом ТекIоныгъэр къызщыдахыгъэм ия 80-рэ илъэс ар фэгъэхьыгъэщт ыкIи къэралыгъом ишъолъыр 85-мэ ялIыкIохэм зыщаушэтыщт.

УФ-м и Президентэу Владимир Путиным зэрэхигъэунэфыкIыгъэ­мкIэ, физическэ культурэм пыщагъэхэр ыкIи зипсауныгъэ зыгъэпытэ зышIоигъо цIыфхэр мы Iофтхьабзэм зэрепхых.
Илъэс къэс рагъэкIокIырэ Iоф­тхьабзэм нэбгырэ миллионрэ ныкъорэ фэдиз хэлажьэ. Гъо­гу­уа­нэм икIыхьагъэ зы километрэм щегъэжьагъэу 12-м нэс. Зызыушэтыхэрэм аныбжь ыкIи ухьазырыныгъэу аIэкIэлъым елъытыгъэу къачъыщтыр зыфэдизыр агъэнафэ. Iофтхьабзэм ухэлэжьэным пае ыпкIэ лъыптын ищыкIагъэп, къэралыгъо фэIо-фашIэхэм ясайт уихьанышъ, ащ зыщыптхын плъэкIыщт.