Адыгэ Республикэм и ЛIы­шъхьэу КъумпIыл Мурат ура­мэу Первомайскэм тет Мые­къопэ къэлэ IэзапIэм икъутамэу бэмышIэу игъэкIотыгъэ ­гъэцэкIэжьынхэр зыщаухыгъэм щыIагъ.

Лъэпкъ проектэу «Псауныгъэм икъэухъумэн» зыфиIорэм къыдыхэ­лъытагъэу пэублэ организациехэм ягъэкIэжьын ипрограммэ диштэу 2024-рэ илъэсым къыщыублагъэу IофшIэнхэр ащ щыкIуагъэх. Феде­ральнэ бюджетым щыщэу сомэ миллион 20-м ехъу ащ къыфыхагъэкIыгъ, мебелыкIэм икъэщэфын республикэ бюджетым щыщ сомэ миллиони 8 пэIуагъэхьагъ.
ЛIышъхьэм игъусагъэх АР-м иминистрэхэм я Кабинет и Тхьаматэ игуадзэу — АР-м финансхэмкIэ иминистрэу Виктор Орловыр, программэу «ЛIыхъужъхэм яуахът» зыфиIорэм хэлэжьэрэ Сергей Ковалевыр, АР-м псауныгъэм икъэухъумэнкIэ иминист­рэу Мэрэтыкъо Рустем, подряднэ организациехэм ялIыкIохэр.

КъумпIыл Мурат цIыфхэу къяуа­лIэхэрэм ыкIи врачхэу ащ щыла­жьэхэрэм гущыIэгъу афэхъугъ, Iэза­пIэм илъэс 40 хъугъэу Iоф зишIэрэм къыкIоцI апэрэу игъэкIотыгъэ гъэцэкIэжьынхэу щызэшIуахыгъэхэм язытет уасэ фишIыгъ. Ащ цIыфэу къеуалIэхэрэм ямызакъоу щылэжьэрэ медицинэ IофышIэхэми амал дэгъухэр яIэнхэр, Iэрыфэгъоу ар щытыныр къыдалъытагъэх. Ар зычIэт унэм иинженер хъытыухэр, унэкIоцI коммуникациехэр зэблахъугъэх, регистратурэмрэ врачхэм Iоф зыщашIэрэ унэхэмрэ язытет нахьышIу ашIыгъ, мебелыкIэр, гъэучъыIалъэхэр арагъэуцуагъэх, цIыфхэр чэзыум ежэнхэмкIи чIыпIэ гъэнэфагъэхэр яIэ хъугъэх. Псэуалъэм ыгупэ агъэкIэ­жьыгъ, къэгъагъэхэм псы атезыкIэщт пкъыгъори хагъэуцуагъ.

Мыекъопэ къэлэ IэзапIэм иврач шъхьаIэу ЕмтIылъ Оксанэ къызэри­IуагъэмкIэ, джырэ шапхъэхэм адиштэу ар зэтырагъэпсыхьагъ. Электрон шIыкIэм тетэу атхыхэ зэрэхъугъэм ишIуагъэ къэкIуагъ цIыфхэм врачхэр яплъынхэм пае зэряжэхэрэ уахътэр хэпшIыкIэу гъэкIэкIыгъэнымкIэ ыкIи медицинэ IэпыIэгъоу аратырэм нахь зыкъыIэтынымкIэ. КъэIогъэн фае мы IэзапIэм нэбгырэ мин 11-м ехъумэ яфэIо-фашIэхэр зэригъэцакIэхэрэр ыкIи мафэ къэс нэбгырэ 200 — 300 фэдиз къызэряуалIэрэр.
Республикэм и ЛIышъхьэ цIыфхэу IэзапIэм къэкIуагъэхэм гущыIэгъу за­фэхъум IофшIэнхэу агъэцэкIагъэхэм якIэуххэр нафэ къыфэхъугъэх. Анахьыбэр зэхъокIыныгъэшIухэм агъэрэзагъэх. НепэкIэ чэзыухэр щыIэжьхэп. IофышIэхэу ящыкIагъэхэм афэдизи яIэ хъугъэ. Терапевтхэм анэмыкIэу мыщ урологым, эндокринологым, офтальмологым, нев­рологым, кардиологым ыкIи нэмыкI-
хэм Iоф щашIэ.
IэзапIэм иIофшIэн тапэкIи нахь дэгъоу зэхэщэгъэнымкIэ, джырэ уахътэм диштэрэ технологиехэр гъэфедэгъэн­хэмкIэ, врачхэм яIэпэIэсэныгъэ зы­къегъэIэтыгъэнымкIэ КъумпIыл Мурат пшъэрылъ заулэ афишIыгъ. Медицинэ IофышIэхэм задэгущыIэм АР-м и ЛIы­шъхьэ анахьэу ынаIэ зытыригъэтыгъэр цIыфхэм ядиспансеризацие иIофыгъохэр ары. Нафэу зэрэщытымкIэ, ащ узыр нахьыжьэу къыхэгъэщыгъэным иамал къеты.
Республикэм и ЛIышъхьэ къызэрэхигъэщыгъэмкIэ, УФ-м и Президентэу Владимир Путиным медицинэ IэпыIэ­гъум изытет нахьышIу шIыгъэным те­гъэпсыхьэгъэ пшъэрылъхэу къыгъэуцугъэхэм адиштэу псауныгъэм икъэухъу­мэнкIэ IофшIэныр республикэм щылъэ­кIуатэ, сымэджэщхэм язэтегъэпсыхьанкIэ проект ин заулэ зэшIохыгъэ мэхъу. Пэублэ организациехэр гъэкIэжьыгъэнхэм лъэшэу анаIэ тырагъэты. Игъом лъэныкъо пстэумкIи цIыфхэм IэпыIэгъу араты зыхъукIэ, сымэджэ хьылъэхэм япчъагъи къыкIичыщт, псауныгъэм икъэу­хъумэн истационар учреждениехэм атегъэкIагъэри нахь макIэ хъущт. Ащ епхыгъэу лъэпкъ проектыкIэу «ГъэшIэ кIыхьэр ыкIи чаныр» зыфиIорэм диштэу гъэкIэжьыгъэным ипрограммэ игъэцэ­кIэн республикэм щылъэкIуатэ.
АР-м псауныгъэм икъэухъумэнкIэ иминистрэу Мэрэтыкъо Рустем къызэриIуагъэмкIэ, IэзапIэм пае унакIэ урамэу Калининым ыцIэ зыхьырэм щагъэ­псыным иамал непэ хэплъэх. Нафэу зэрэщытымкIэ, а унэр жъы дэдэ хъугъэ.

ПсэупIэу Тульскэм, станицэу Ханскэм, къуаджэу АдыгеякIэм IэзэпIакIэхэр аща­шIынхэу рахъухьэ. Амбулаторнэ гупча­кIэхэр къарытэджэщтых «Черемушка­кIэкIэ» заджэхэрэмрэ Севернэмрэ. Не­пэкIэ цIыфхэр зычIэсыщт унэхэм яшIын игъэкIотыгъэу а лъэныкъом щэкIо. ПсэупIэу Яблоновскэм шIэхэу къэлэ статус зиIэ хъун ылъэкIыщтым, сымэджэщ щыгъэпсыгъэным иIофыгъуи тегущыIэх.
«Тэ типшъэрылъыр зыщыпсэурэ чIыпIэм емылъытыгъэу, Адыгеим ис нэбгырэ пэпчъ медицинэ Iэпы­Iэгъу дэгъу зэригъэгъотыным иамал ядгъэгъотыныр ары. ЦIыфхэмкIэ нахь гупсэф, нахь Iэрыфэгъу зэрэ­хъущтым тетэу медицинэ учреж­дениехэм яIофшIэн нахь дэгъоу зэ­хэщэгъэным епхыгъэ Iофтхьабзэхэр лъыдгъэкIотэщтых», — къыхигъэщыгъ КъумпIыл Мурат.
Медицинэ
фэIо-фашIэхэр нахьышIоу
зэхэщэгъэнхэр
Федеральнэ проектэу «Псауныгъэм икъэухъумэнкIэ инфраструктурэм зе­гъэушъомбгъугъэныр» зыфиIорэм къыдыхэлъытагъэу М. Хь. Iэшъхьэмафэм ыцIэкIэ щыт республикэ онкодиспан­се­рыр зычIэт унэ шъхьаIэм изэтегъэпсы­хьан мы илъэсым рагъэжьагъ. Респуб­ликэм и ЛIышъхьэу КъумпIыл Мурат ащ щыIагъ, IофшIэнхэр зэрэкIохэрэм зыщигъэгъозагъ. Ащ игъусагъэх АР-м иминистрэхэм я Кабинет и Тхьаматэ игуа­дзэу Хъоткъо Хъызыр, АР-м псауныгъэм икъэухъумэнкIэ иминистрэу Мэрэтыкъо Рустем, подряднэ организациехэм ялIыкIохэр.
Шъугу къэтэгъэкIыжьы: Урысые Федерацием и Президентэу Владимир Путиным онкодиспансерым иигъэкIо­тыгъэ гъэцэкIэжьын иIофыгъо тапэкIэ къыдыригъэштэгъагъ — проектыр фе­деральнэ программэм хагъэхьанэу уна­шъо аштэгъагъ. Сомэ миллион 830-м ехъу федеральнэ ыкIи шъолъыр бюджетхэм къахагъэкIыгъ гъэцэкIэжьыным пэIухьанэу.
А ахъщэмкIэ унэр зэрэпсаоу агъэ­кIэжьыщт, нэмыкI унэхэри къыпашIыхьащтых. Корпус шъхьаIэм ыубытырэр квадрат метрэ мини 4,5-рэ фэдиз мэхъу, зызэтырагъэпсыхьажьырэ ыкIи я 4-рэ къатыр къызытырашIахьыжьырэ нэужым чIыпIэу ыубытырэр квадрат метрэ мини 5,1-м нэсыщт. Мы илъэсым ыкIэм Iоф­шIэнхэр аухынхэу рахъухьагъ. ЯтIонэрэ чэзыур зэпхыгъэр онкодиспансерым зэлъиубытырэ чIыпIэм къати 7 хъущт унакIэ щышIыгъэныр ары. Мы лъэхъаным псэуалъэм ылъапсэ, дэпкъхэр агъэ­пытэх. АР-м и ЛIышъхьэ унэр къызеплъыхьэ нэужым АР-м псауныгъэм икъэухъумэнкIэ и Министерствэ пшъэ­рылъ фишIыгъ техническэ Iофхэм ячэзыу пэпчъ гъэцэкIагъэ зэрэхъурэм пхъашэу лъыплъэнэу, псэуалъэр игъом ыкIи дэгъоу зэтырагъэпсыхьаным ынаIэ тыригъэтынэу. КъумпIыл Мурат къызэрэхигъэщыгъэмкIэ, УФ-м и Президентэу Владимир Путиным къыгъэуцугъэ пшъэ­рылъхэу псауныгъэм икъэухъумэн иучреждение гъэкIэжьыгъэным ыкIи ме­дицинэ IэпыIэгъур цIыфхэм зэраратырэр нахьышIу шIыгъэным япхыгъэхэм мэхьанэшхо яIэу щыт.
Онкодиспансерым иврач шъхьаIэу АкIэхъу Заур къызэриIуагъэмкIэ, Iоф­шIэнхэр макIохэ нахь мышIэми, медицинэм иIофышIэхэм япшъэрылъ зэпа­гъэурэп, нэмыкI чIыпIэхэм сымаджэхэм щяIазэх ыкIи упчIэжьэгъу ашIых. Ащ нэмыкIэу Мыекъуапэ икIэу Кощхьаблэ нэсыщт автобусыр тырагъэуцуагъ, сыда пIомэ Кощхьэблэ район сымэджэщым онкодиспансерым иотделениехэм ащыщ­хэр пIэлъэ гъэнэфагъэкIэ щыIэщтых.
АР-м и ЛIышъхьэ псауныгъэр къэухъу­мэгъэнымкIэ Министерствэмрэ онкодиспансерымрэ япащэхэм игъо афилъэгъугъ пэрыт IофшIакIэр нахь чанэу къыз­фагъэфедэнэу, медицинэ IэпыIэгъумкIэ технологиехэу джырэ уахътэм диштэхэрэр къызIэкIагъэхьанхэу. Узыр нахьыжьэу къыхагъэщыным пае цIыфхэм ядиспансеризацие иIофыгъохэми шъхьа­фэу атегущыIагъэх.
«ПсэолъэшIын Iофхэр шэпхъэшIухэм адиштэнхэм изакъоп тэркIэ мэхьанэшхо зиIэр, медицинэ фэIо-фашIэу афагъэцакIэхэрэм язытети икъоу къыдэлъытэгъэн фае. Онкодиспансерым иунэу агъэ­кIэжьыщтыр сымаджэхэмкIи, медицинэ IофышIэхэмкIи Iэрыфэгъоу щытын, медицинэ фэIо-фа­шIэхэм язытети ахэм яфэмэ-бжьы­мэ къатырихьан фае», — къыIуагъ КъумпIыл Мурат.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.