Республикэм ичIыпIэ анахь дахэмэ ащыщэу Рыфабгъо ипсы­къе­чъэх­хэм адэжь адыгэ шэн-хабзэхэм афэгъэхьыгъэ ныбжьыкIэ лагерэу «Адыгэ хабз» зыфиIорэр мы мафэхэм къыщызэIуахыгъ.

Адыгэ лъэпкъым иныбжьыкIэ 80 фэдиз мыщ щызэрэугъоигъ, ахэр Адыгеим имызакъоу Тыр­куем, Къэбэртэе-Бэлъкъарым, Къэрэщэе-Щэрджэсым, Крас­нодар краим къарыкIыгъэх.
Адыгабзэр дэгъоу зышIэрэ, зыгъэлъэпIэрэ ныбжьыкIэхэм тхьамафэм къыкIоцI загъэпсэфыщт ыкIи адыгэ культурэм, шэн-хабзэхэм афэгъэхьыгъэу яшIэныгъэхэм ахагъэхъощт.
Лагерым ипащэу, гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм ипащэ игуадзэу Биданэкъо Марзет гухэлъэу яIэхэр къытфиIотагъэх.
— Проектнэ офисым ишIуагъэкIэ мыщ фэдэ Iофтхьабзэхэр зэхэтщэнхэ амал тиI. Мыгъэ ящэнэрэу адыгабзэм фэщэгъэ ныбжьыкIэхэр зэхэтэщэх. Зиныдэлъфыбзэ дэгъоу зышIэрэ, лъэпкъ шэн-хабзэхэр, культурэр зышIогъэшIэгъонэу, нахь игъэ­кIотыгъэу зэзыгъашIэ зышIоигъохэр ары къедгъэблэгъа­гъэхэр. Ыпэрэ илъэсхэм щы­Iагъэхэм ащыщхэр джыри ягуа­пэу къэкIуагъэх, апэрэу хэ­лажьэ­хэрэми шIоигъоныгъэ ин яIэу къекIолIагъэх. ГъэрекIо къыщегъэжьагъэу тилагерь дунэе мэ­хьанэ иIэ хъугъэ. Тыркуем щыщ­хэр ятIонэрэ илъэс хъугъэу къэкIох, джащ фэдэу абазинхэу черкесыбзэр дэгъоу зыIулъхэр ятIонэрэу къетэгъэ­благъэх, — еIо Марзет.
Программэ гъэшIэгъон ныбжьыкIэхэм афагъэхьазырыгъ. Мафэ къэс адыгэ шэн-хабзэ­хэр, культурэр къизыIотыкIырэ Iофтхьабзэхэр, адыгабзэм имэхьанэ къизыIотыкIырэ егъэ­джэнхэр, лекциехэр, зэнэкъо­къухэр бэу афызэхащэщтых. Мэфи 7-м къыкIоцI ныдэлъ­фы­бзэкIэ шIокI имыIэу зэдэгущыIэнхэр пшъэрылъ шъхьаIэхэм ащыщ. Адыгэ бзылъфыгъэм ипшъэрылъхэр, шъхьэкIафэу фэпшIын фаер, унагъом хъулъфыгъэм мэхьанэу щыриIэр ыкIи нэмыкIыбэ къафаIотэщт. Адыгэ хабзэм идэхагъэ ныбжьыкIэхэм арагъэлъэгъущт, ар зэра­хьанэу къяджэщтых.
— Пшъэрылъ шъхьаIэу тиIэр адыгабзэкIэ гущыIэрэ ныб­жьыкIэхэр нахьыбэ хъунхэр, яныдэлъфыбзэ агъэлъэпIэныр ары. Апэрэ мафэм адыгэ ха­бзэм фэгъэхьыгъэ щысэхэр къафэтхьыхэзэ гущыIэгъу та­фэхъугъ. Адыгэ унагъом зэ­фыщытыкIэу илъыр къафэтIо­тагъ, ашIогъэшIэгъонэу упчIэхэр къатыгъэх. Пчыхьэ къэс джэгу зэхэтщэщт, — еIо Биданэкъо Марзет.
Программэм къыдыхэлъы­тагъэу республикэм ичIыпIэ дахэхэм ныбжьыкIэхэр ащэщтых, Еутых Асе и Дышъэ Ордэунэ арагъэлъэгъущт, ­лъэпкъ театрэм иактерхэм гущыIэгъу афэхъущтых ыкIи спектаклэу «ЧIыгу Iэбжыб» зыфиIорэр ­къафагъэлъэгъощт. Джащ фэдэу мафэ къэс Адыгеим ицIыф цIэрыIохэр къырагъэблагъэ­хэзэ ныбжьыкIэхэм гущыIэгъу афэхъущтых.
ЗэхэщэкIо купым хэхьагъэхэм ащыщых адыгабзэмкIэ кIэ­лэегъаджэу Темзэкъо Маринэ, гъэсэныгъэ IофымкIэ пащэм игуадзэу, Адыгэ Хасэм хэтэу, УФ-м ыкIи АР-м язаслуженнэ тренерэу Хъот Юныс, ащ нэмыкIэу гуманитар ушэтынхэмкIэ Адыгэ республикэ инсти­тутым иIофышIэхэу Сихъу СултIан, Нэгъэрэкъо Казбек, Цэй Марет, Барцо Рустам. Сурэтхэр тырехых Тлюнэе Азэмат. Мыхэм япшъэрылъхэр чанэу агъэцакIэх.
ДЕЛЭКЪО Анет.