Адыгеир къызэIуахыщт
2025-рэ илъэсым граждан обществэм хэхъоныгъэ ышIынымкIэ Адыгэ Республикэм игрант къыдэхыгъэным фэгъэхьыгъэ зэнэкъокъум изэфэхьысыжьхэмкIэ, проектэу «Эколого-краеведческэ экспедицием иеджапIэу «Адыгеир къызэIух» зыфиIорэм текIоныгъэ къыдихыгъ ыкIи щыIэныгъэм щыпхыращынэу агъэнафэ.
Сатыум емыпхыгъэ автоном организациеу «Социальнэ-культурнэ гухэлъхэмкIэ агентствэу «Таланти-
дам» сатыум емыпхыгъэ автоном организациеу «Граждан обществэм хэхъоныгъэхэр егъэшIыгъэнхэмкIэ грантхэм яоператор» зыфиIорэр, Мыекъопэ районым ит гъэсэныгъэ гупчэу N 2-р игъусэхэу проектым кIэщакIо фэхъугъэх.
Краснооктябрьскэ къоджэ псэупIэм дэс кIэлэеджакIохэм экологиемкIэ, культурэмкIэ ыкIи краеведениемкIэ шIэныгъэ яIэныр ары проектым ипшъэрылъ шъхьаIэр. Кавказ биосфернэ заповедникым зы мэфэ экспедициехэр шышъхьэIум и 14-м, и 15-м, и 27-м ыкIи и 28-м щыIэщтых.
ШышъхьэIум и 12-м къыщегъэжьагъэу Краснооктябрьскэ къоджэ псэупIэм дэс кIэлэеджакIохэм апае ныбжьыкIэ проектыр аублагъ. Мыекъопэ районым ит поселкэхэу Краснооктябрьскэм, Табачнэм, Курджипскэм, станицэу Дагестанскэм ащыщ ныбжьыкIэ 400-м ехъу ащ хэлэжьэщт. Поселкэу Гъозэрыплъэ Кавказ биосфернэ заповедникым фэгъэхьыгъэу экспедицие щызэхащэщт, джащ фэдэу археологие комплексэу ДжэгокIо гъэхъунэм ащэщтых.
Проектэу «Адыгеир къызэIух» зыфиIорэм къыдыхэлъытагъэу шъолъырым ныбжьыкIэхэр нахь фэщагъэ хъущтых, егъэджэн сыхьатхэм ачIыпIэкIэ чIыпIэ зэфэшъхьафхэм ащэщтых.
Зы мэфэ зекIом ыуж творческэ зэнэкъокъумкIэ проектым падзэжьыщт. КIэлэцIыкIу сурэтхэм арт-псэуалъэхэр къагъэбаищтых, сочинение анахь гъэшIэгъонхэр гъэзетэу «Маякым» къырагъэхьащтых. Анахь цIыкIухэм эколого-краеведческэ джэгукIэ афызэхащэщт. Илъэсым ыкIэм нэс кIэлэеджэкIо 700 фэдиз проектым хэлэжьэнхэу агъэнафэ. Ахэм ахэтыщтых хэушъхьафыкIыгъэ дзэ операцием хэлажьэхэрэм ясабыйхэр, кIэлэцIыкIубэ зэрыс унагъохэм ыкIи гъот макIэ зиIэхэм къарыкIыхэрэр.
НэкIубгъор зыгъэхьазырыгъэр Делэкъо Анет.