ПцэжъыеешэнымкIэ Урысыем ичемпионат къыдыхэлъытэгъэ команднэ зэнэкъокъухэм Адыгеим илIыкIохэм яплIэ­нэрэу текIоныгъэр къыщыдахыгъ.

Iофтхьабзэр зыщыкIуагъэр Кемеровскэ хэкум ипсыубытыпIэу «Береговой» зыфиIорэр ары. Джащ фэдэу нэбгырэ тIурытIу хъухэрэм язэнэкъокъу республикэм икIы­гъэхэм ятIонэрэ чIыпIэр къащыфагъэшъо­шагъ. Урысыем ишъолъыр 11-мэ якомандэ 12-мэ заушэтыгъ.
ПцэжъыеешэнымкIэ зэнэкъокъухэр аужырэу мы псыубытыпIэм зыщызэхащагъэхэр 2018-рэ илъэсыр ары. Ащ къыхэкIкIэ тренерскэ штабым унашъо ышIыгъ турнирыр рамыгъажьэзэ Адыгеим ихэшыпыкIыгъэ командэ хэтхэм зэрифэшъуашэу ащ зы­фагъэхьазырыным пае нахьыжьэу ащэнхэу. Ащ фэдэ екIолIакIэм ишIуагъэкIэ нахь тэрэзэу зэрэзекIощт шIыкIэхэр агъэнэфагъэх ыкIи зэнэкъокъум иапэрэ мафэ къыщегъэ­жьагъэу пэрытныгъэр аубытыгъ.
Мы мафэхэм ом изытет уигъэрэзэнэу щытыгъэп, жьыбгъэм, ощхым ыкIи ошIэ-­дэмышIэу къызэрэучъыIыгъэм яягъэшхо къэкIуагъ. Ау а пэрыохъухэм тиспортсменхэр къагъэщтагъэхэп, текIоныгъэм фэбэ­нагъэх. Командэхэм язэнэкъокъу Адыгеир ащытекIуагъ, Алтайскэ краим ятIонэрэ чIыпIэр къыдихыгъ, Свердловскэ хэкур ящэнэр. Нэбгырэ тIурытIу хъухэрэм язэнэ­къокъу дышъэ медальхэр къыщахьыгъэх Мордовием илIыкIохэу Валерий Прохоровымрэ Вячеслав Муковымрэ. Адыгеир къэзыгъэлъэгъогъэхэ Артюхинхэу Сергейрэ Алексейрэ ятIонэрэ чIыпIэр афагъэшъошагъ, Чэчэн Республикэм испортсменхэу Денис Максимушкинымрэ Михаил Поры­вае­вымрэ ящэнэрэх.
ТекIоныгъэр ыкIи ящэнэрэ чIыпIэр къыдэзыхыгъэхэм яспорт гъогу Адыгеим щырагъэжьагъ, ау джы нэмыкI шъолъырхэр къагъэлъагъох.