Адыгеим игандболисткэхэр Урысыем иныбжьы­кIэхэм я Спартакиадэ къыдыхэлъытэгъэ зэнэ­къо­къум ифиналныкъо ихьанхэ алъэкIыгъэп.

Къэралыгъом икомандэ анахь лъэшхэр турнирым хэлажьэх, тхьамафэм къыкIоцI заушэтыщт. Адыгеир къэзыгъэлъагъохэрэр спорт еджапIэу С. М. Джэнчатэм ыцIэ зыхьырэм зыщызыгъасэхэрэр ары.
«АГУ-Адыиф-2» зыфиIорэм ­хэт пшъашъэхэм куп едзыгъом къыдыхэлъытагъэу ешIэгъуиплI яIагъ. Ставрополь краим ыкIи Санкт-­Петербург якомандэхэм зэIукIэгъухэр къашIуахьыгъэх, ау Краснодар краимрэ Волгоград хэкумрэ къатекIуагъэх. Ащ къыхэкIкIэ купым ящэнэрэ чIыпIэр щаубытыгъ ыкIи къыкIэлъыкIорэ уцугъом Ростов хэкум икомандэ IукIэнхэ фае хъугъэ. Ростовчан­кэхэр нахь лъэшыгъэх, 36:21-у зэIукIэгъур ахьыгъ. Джащ фэдэу Самарскэ хэкур Ставрополь краим (пчъагъэр — 36:19), Моск­ва Волгоград хэкум (пчъагъэр — 40:29) атекIуагъэх. Купым яплIэнэрэ чIыпIэр щызыубытыгъэ Московскэ хэкум икомандэ ошIэ-дэмышIэу пэрытныгъэр зыу­бытыгъэ Краснодар краим те­кIуагъ, пчъагъэр — 37:26.

Командэхэм ешIэгъу тIурытIу къафэнагъ. Непэ Мыекъуапэ игандболисткэхэр Краснодар краим илIыкIохэм аIукIэщтых, текIорэ командэр ятфэнэрэ чIыпIэм фэбэнэн ылъэкIыщт.