Хьыкум приставхэм я Мыекъопэ къэлэ къутамэ хэбзэIахьхэмкIэ чIыфэ зытелъхэм къягъэтыжьыгъэнымкIэ рейд зэхащагъ.

А Iофтхьабзэм къыдыхэлъытагъэу приставхэр унэгъуи 10-мэ адэжь Iухьагъэх. Ау яунэхэм арамыгъотагъэхэри къахэкIыгъэх. Ахэм акти 2 зэхагъэу­цуагъ (автомобилитIу: LADA ыкIи ГАЗель агъэ­федэн фимытхэу ашIыгъ). Хьыкум прис­тавхэм я Мыекъопэ къэлэ къутамэ зэригъэунэфыгъэмкIэ, ГАЗелыр зиунаем транспорт хэбзэIахьэу телъыр сомэ мин 200-м шIокIы. LADA-р зием телъыр сомэ мини 170-рэ.
Автомобильхэр зиунаехэм ахэр ащэнхэу е шIухьафтынэу аратынхэу фитхэп. Урысые Федерацием и Уголовнэ кодекс ия 312-рэ статья къызэриIорэмкIэ, арест зытыралъхьэгъэ мылъкум хэбзэнчъэу дэзекIохэрэм уголовнэ пшъэдэкIыжь арагъэхьы.
ЧIыфэу ателъыр мы охътэ благъэхэм къызамытыжькIэ, транспортыр хабзэу щыIэм тетэу IуагъэкIыщт.
Урысыем ихьыкум приставхэм я Федеральнэ къулыкъу и ГъэIорышIапIэу Адыгэ Республикэм щыIэм цIыфхэм агу къегъэкIыжьы: чIыфэ шъутелъмэ игъом зэжъугъэшIэн фае. ГъэIорышIапIэм иофициальнэ сайтэу v01.fssp.gov.ru-м шъутеомэ, къэбарыр зэжъугъэшIэн ыкIи ахъщэр шъутын шъулъэкIыщт.
Урысыем и ФССП и ГъэIорышIапIэу Адыгэ Республикэм щыIэм ипресс-къулыкъу