Сэнаущыгъэ зыхэлъ ныбжьыкIэхэм яслетэу «Фыщт» зыфиIоу илъэс къэс зэхащэрэм къы­дилъытэрэ Iофтхьэбзэ шъхьаIэхэр Мыекъопэ районым щыкIуагъэх.

Адыгэ Республикэм иму­ниципалитет пстэуми, джащ фэдэу Беларусым, Абхъазым, Урысыем ишъолъырхэм ащыщ­хэу Краснодар краим, Къэ­бэр­тэе-Бэлъкъарым, Къэрэщэе-­Щэрджэсым, Къалмыкъым, Херсон хэкум ялIыкIохэр зы­хэтыгъэ купыр нэбгырэ 500-м ехъущтыгъ.
ЕджэнымкIэ, спортымкIэ, творчествэмкIэ, общественнэ IофшIэнымкIэ гъэхъагъэхэр зышIыгъэ кIалэхэмрэ пшъа­шъэхэмрэ ягъусэу Адыгеим и ЛIышъхьэ къушъхьэу Фыщт ылъа­псэ лъэсэу екIугъэх. Джащ фэдэу Къэбэртэе-Бэлъкъарым ныбжьыкIэ IофхэмкIэ ими­нист­рэу Лу Азамат, федеральнэ программэу «ЛIыхъужъхэм яуахът» зыфиIорэм хэлэжьэрэ Сергей Ковалевыр, АР-м псау­ныгъэр къэухъумэгъэнымкIэ иминистрэу Мэрэтыкъо Рустем, культурэмкIэ министрэу Аулъэ Юрэ, мэкъу­мэщымкIэ министрэу Къуанэ Анзаур, АР-м ныбжьыкIэ IофхэмкIэ и Комитет итхьаматэу Максим Галушкиныр, культурэ кIэным икъэухъумэнкIэ ыкIи игъэфедэнкIэ ГъэIорышIапIэм ипащэу ЦIыпIынэ Рустем, зекIонымкIэ ыкIи зы­гъэпсэфынымкIэ Комитетым итхьаматэ игуадзэу Джарымэ Бэлэ, республикэм имуниципалитетхэм япащэхэр форумым къекIолIагъэх.

Фыщт шъхьэегъэзыпIэм къекIолIа­гъэхэм апае игъэкIотыгъэ программэ къагъэхьазырыгъагъ, культурэм, гъэсэныгъэм, спортым ыкIи тыкъэзыуцухьэрэ дунаим икъэухъумэн япхыгъэ Iоф­тхьабзэхэм яплъыгъэх. Республикэм зэ­кIэ икъалэхэмрэ ирайонхэмрэ ятворческэ программэхэр къагъэлъэгъуагъэх. Ащ нэмыкIэу мэфитIум къыкIоцI лагерым концерт къыщаты, адыгэ джэгу ашIыгъагъ, гитарэр аIыгъэу пхъэ машIом дэжь орэдхэр къыщаIуагъэх, дышъэидэнымкIэ мастер-классхэр зэхащагъэх. Лъэпкъ Iэмэ-псымэхэмкIэ орэдхэр къы­рагъэIуагъэх, адыгэ къашъохэр къашIыгъэх, шыхэм атесхэу яIэпэIэсэныгъэ къагъэлъэгъуагъ, лъэпкъ, спорт джэгукIэ, зэнэкъокъу зэфэшъхьафхэри рекIо­кIыгъэх.

Урысыем ичемпионэу, самбэмкIэ дунаим и Кубок къыдэзыхыгъэ Наш Расул флешмобэу «Зарядка с чем­пионом» зыфиIорэр зэхищэгъагъ, тыкъэ­зыуцухьэрэ дунаим епхыгъэ лекциехэр, зекIохэр зэхащэгъагъэх.
Iофтхьабзэм ихъугъэ-шIэгъэ шъхьаIэу хъугъэр АР-м и ЛIышъхьэу КъумпIыл Муратрэ республикэм ихэбзэ къулы­къухэм япащэхэмрэ зэIукIэгъоу ахэм адыряIагъэр ары. Республикэм и ЛIы­шъхьэ слетым хэлажьэхэрэм шIуфэс къарихыгъ, ячаныгъэ, Адыгеим ихэхъоныгъэ яIахь зэрэхашIыхьэрэм ыкIи ищытхъу чыжьэу агъэIуным зэрэпылъхэм апае зэрафэразэр къыIуагъ. Анахьэу рэзэныгъэ гущыIэхэр зыфэгъэ­хьыгъагъэхэр хэгъэгухэу ыкIи шъолъыр­хэу слетым хэлэжьэнхэм пае зилIыкIохэр къэзыгъэкIуагъэхэм япащэхэр, джащ фэдэу Кавказ биосфернэ заповедникым идирекцие ыкIи Iофтхьабзэм изэхэщэн хэлэжьагъэхэр ары.

«Илъэс къэс мы чIыпIэ дахэм ты­къыщызэрэугъои, тызэрэзэIукIэщтым, ты­зэрэзэдэгущыIэщтым тяжэ. Непэрэ зэхахьэр Хэгъэгу зэошхом ТекIоныгъэр кызщыдэтхыгъэм ия 80-рэ илъэс фэ­гъэхьыгъэу зэрэщытыр тэрэз дэдэу сэлъытэ. Тятэжъхэмрэ тятэжъ пIашъэ­хэмрэ Урысыер мамырэу щыIэнымкIэ, хэхъоныгъэ ышIынымкIэ фитыныгъэу иIэр ахэм къаухъумагъ. Непэ хэушъ­хьафыкIыгъэ дзэ операцием ишъолъыр щыIэ кIалэхэр тихэгъэгу инеущырэ мафэ фэбанэх. Мыщ фэдэ лъэхъаным ахэм такъоуцон, патриотическэ Iофтхьабзэхэр зэхэтщэнхэм, тарихъыр зытетым тетэу къэнэным тынаIэ атедгъэтын фае», — къыIуагъ КъумпIыл Мурат.

Ащ нэужым республикэм и ЛIышъхьэ Адыгеим иэкономикэ хэхъоныгъэ зэришIырэм фэгъэхьыгъэу къыIотагъ, социальнэ пшъэрылъхэр зэкIэ зэшIохыгъэ хъунхэмкIэ лъэпсэ шъхьаIэхэм зызэраушъомбгъурэри къыхигъэщыгъ. Хэу­шъхьафыкIыгъэ дзэ операцием хэла­жьэхэрэм ыкIи ахэм яунагъохэм Iэпы­Iэгъу араты, лъэныкъо зэфэшъхьафхэмкIэ агъэнэфэгъэ проектхэр щыIэ­ныгъэм гъэцэкIагъэ щэхъух.

Ащ нэужым занкIэу, шъхьэихыгъэу зэIукIэгъум хэлажьэхэрэм упчIэхэр къа­тыгъэх, республикэм и ЛIышъхьи, министерствэхэм, чIыпIэхэм япащэхэми джэуапхэр ахэм къаратыжьыгъэх.
ЗытегущыIагъэхэм зыкIэ ащыщыгъ ныбжьыкIэхэр кIэщакIо зыфэхъурэ Iофыгъохэм адегъэштэгъэныр. КъумпIыл Мурат къыIуагъ илъэс къэс ныбжьыкIэ политикэм мылъкоу пэIуагъахьэрэр нахьыбэ зэрэхъурэр ыкIи непэ миллиони 100-м ар зэрэшIокIырэр. Социальнэ проектхэм алъэныкъокIэ грант IэпыIэгъур щыI, ныбжьыкIэхэм атегъэ­псыхьэгъэ къэралыгъо программэхэм къызэрэдалъытэрэм тетэу ябизнес къы­зэIуахынымкIэ, чIыгур алэжьынымкIэ ыкIи нэмыкI лъэныкъохэмкIэ IэпыIэгъу афэхъух.

«Тэ тышъуиIэпыIэгъу, ныбжьыкIэхэм гъэпсын Iофтхьабзэу къырахьыжьэхэ­рэмкIэ тадеIэным тыфэхьазыр. ЧIыпIэ зэфэшъхьафхэм ныбжьыкIэхэм гущы­Iэгъу тащыфэхъу, обществэм щыщхэу анахь чанхэм яеплъыкIэхэр къыдэт­лъытэхэзэ, тиIофшIэн тэгъэпсы. Тызэгъусэу, ткIуачIэ зэхэлъэу бэ зэшIотхыгъахэр. Ахэм зыкIэ ащыщ Адыгеим истудентхэм я Ассоциацие зэрэзэха­щагъэр. Тиреспубликэ икIыгъэ студентхэу хэгъэгум ишъолъыр зэфэшъхьафхэм ащеджэхэрэр ащ хэтых. КIэкIэу къэпIон хъумэ, ныбжьыкIэхэм ялъэныкъо гупсэ дыряIэ зэпхыныгъэр къагъэланлэрэп, зэхъокIыныгъэшIухэм ахэлажьэх ыкIи сицыхьэ телъ тапэкIи, тыдэ щыIэщтхэми, сыд фэдэ Iоф агъэцэ­кIэщтми ащ фэдэ фыщытыкIэр къызэрэнэжьыщтым», — къыIуагъ АР-м и ЛIышъхьэ.
ЗэдэгущыIэгъум илъэхъан респуб­ликэм иминистрэхэм я Кабинет хэтхэмрэ муниципалитетхэм япащэхэмрэ къа­Iотагъ яIофхэм язытет фэгъэхьыгъэу, ныбжьыкIэ IофышIэхэр зэрящыкIагъэ-
хэм, ахэм яамалхэр къызэIуахынхэ зэ­ралъэкIыщтым, къэралыгъо IэпыIэгъум къыдилъытэрэ Iофтхьабзэхэм афэгъэ­хьыгъэу.

ЗэIукIэгъум икIэуххэр зэфихьысыжьхэзэ КъумпIыл Мурат къызэрэхигъэщыгъэмкIэ, республикэм псынкIэу хэхъоныгъэ ешIы, цIыф псэупIэ пэпчъ на­хьышIум ылъэныкъокIэ зэхъокIыныгъэ-
хэр фэхъух. Ащ пае федеральнэ къэ­кIуапIэхэри, республикэм иамалхэри агъэфедэх. Ау гъэхъагъэ хэлъэу Iоф ашIэным илъэныкъо шъхьаIэхэм ащыщ цIыфхэм IэпыIэгъу ятыгъэныр. ЩыIэныгъэм чанэу зэрэхэлажьэхэрэм, респуб­ликэм ихэхъоныгъэ яIахь зэрэхашIы­хьэрэм апае ныбжьыкIэхэм зэрафэра-
зэр Адыгеим и ЛIышъхьэ къыIуагъ.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.