ШышъхьэIум и 12-м ныбжьыкIэхэм я Дунэе мафэ хагъэунэфыкIы. Гум къинэжьырэ лъэхъан ар. Адыгеир иныбжьыкIэхэм арэгушхо, ахэм янахьыбэр нэутхэх, чаных, лъэныкъо зэфэшъхьафхэмкIэ гъэхъагъэхэр яIэх, республикэм ыцIэ чыжьэу агъэIу.

Зэшъхьэгъусэ ныбжьыкIэхэу Жуковхэу Степанрэ Маргаритэрэ студент унагъохэм я Урысые фестиваль бэмышIэу хэлэжьагъэх. Ахэр Мыекъопэ къэралыгъо технологическэ университетым и Медицинэ институт ия 6-рэ курс ихьагъэх. ПедиатриемкIэ гъэза­гъэу лэжьэнхэм зыфагъэхьазыры, ащ дакIоу Iофи ашIэ.
— Москва щыкIогъэ апэрэ фестивалым тыхэлэжьэн амал тиIэ зэрэхъугъэм тырэгушхо. АдыгеимкIэ апэрэ студент унэгъо ныбжьыкIэу ащ тыщыIагъ. Урысыем ишъолъыр зэфэшъхьафхэм къарыкIыгъэ унэгъо 70-рэ фэдиз хэлэжьагъ. Ахэр нэIуасэ къэтшIыгъэх, гущы­Iэгъу тафэхъугъ. Фестивалым пшъэрылъ шъхьа­Iэу иIагъэр студент унэгъо ныбжьы­кIэхэм фэгъэкIотэнэу яIэхэр арагъэшIэнхэр ары. Ахэм ящыIэкIэ-псэу­кIэ нахьышIу шIыгъэнымкIэ къэралыгъо IэпыIэ­гъоу щыIэхэр къаIотагъэх. Анахь тынаIэ зытетыдзагъэр апшъэрэ гъэсэныгъэ зэбгъэгъотынымкIэ балл те­дзэхэр къызэрэпфыхагъахъохэрэр
ары, — еIо Маргаритэ.
Мыекъопэ къэралыгъо технологическэ университетым фэгъэкIотэнэу къа­фи­шIыхэрэм нэужым тигущыIэгъу та­щи­гъэ­гъозагъ. Къызызэрэщэхэм зэтыгъо IэпыIэгъоу сомэ мин 15 зырыз ахэм къа­ратыгъагъ, бэджэндэу аштэгъэ унэм ыпкIэ щыщ Iахь апшъэрэ еджапIэм афеты. Джащ фэдэу сабый зиIэ унагъо­хэм апае хэушъхьафыкIыгъэ аудиторие ащ хэт, тапэкIэ сабыйхэр зычIэсын алъэ­кIыщт уни хэтынэу агъэнафэ.
2015-рэ илъэсым Мыекъопэ медицинэ колледжым зычIахьэхэм ныбжьыкIэхэр нэIуасэ зэфэхъугъэх, зы группэм исыгъэх. Апэрэ мафэм къыщегъэжьагъэу ныбджэгъуныгъэ азыфагу къихьагъ. Фельдшер сэнэхьат зэрагъэгъотыгъэу IэпыIэгъу псынкIэм исхэу Iоф ашIэнэу аублагъ. Пандемием илъэхъан къиныбэ алъэгъугъ, ау агу амыгъэкIодэу, нахьыжъхэм акIырыплъыхэзэ чанэу Iоф ашIагъ.
2021-рэ илъэсым унагъо зэдашIэнэу рагъэжьагъ. НыбжьыкIэхэр зэгурыIожьхэу зэдэпсэух, зы мафи Iоф амышIэу щысыгъэхэп. Непэ ахэм Адыгэ респуб­ликэ клиническэ психоневрологическэ диспансерым Iоф щашIэ. Зыгъэпсэфыгъо лъэхъаным зекIо кIонхэр якIас, псэу­шъхьэхэр шIу алъэгъу. Гъэхъагъэу яIэхэм ащыщ научнэ IофшIэным фэгъэхьыгъэ Iофтхьабзэхэм, конференциехэм зэра­хэлажьэхэрэр.
Степанрэ Маргаритэрэ ыпэкIэ мап­лъэх, аужырэ курсыр зэрифэшъуашэу къаухынышъ, ординатурэм чIэхьажьынхэу рахъухьэ.

ДЕЛЭКЪО Анет.