Адыгэ къэралыгъо университетым изыгъэпсэфыпIэу «Горная леген­да» зыфиIорэм биологиемкIэ я VIII-рэ ыкIи химиемкIэ я IV-рэ гъэмэфэ егъэджэнхэр мы мафэхэм щыкIуагъэх. МэфэкI шIыкIэм тетэу ар непэ зэфашIыжьыщт.

Мы мафэхэм кIэлэцIыкIухэм яшIэныгъэхэм зыщахагъэхъорэ ыкIи зызыщагъэпсэфырэ лагерым тыщыIагъ. Ащ ипащэу Ма­мый Данэ къызэрэтиIуагъэмкIэ, Урысыем ишъолъыр 14-мэ къа­рыкIыгъэ кIэлэеджэкIуи 100 фэдиз мыщ къекIолIагъ. Ахэр я 8 — 11-рэ классхэм ащеджэх.
— БиологиемкIэ ыкIи химиемкIэ сэнаущыгъэ зыхэлъ ныбжьыкIэхэр ары къедгъэблагъэ­хэрэр. АдыгеимкIэ республикэ естественнэ-хьисап еджапIэм кIохэу, анахь къэгъэлъэгъон дэгъухэр зиIэхэр къыхэтэхых. НэмыкI шъолъырхэм апае олимпиадэ зэхэтэщэ, ащ текIоныгъэ къыщыдэзыхыгъэхэр хэтэгъэлажьэх, — еIо Данэ.
АР-м гъэсэныгъэмрэ шIэ­ныгъэмрэкIэ и Министерствэ, Адыгэ къэралыгъо университетыр, республикэ естественнэ-­хьисап еджапIэр ыкIи шъолъыр гупчэу «Полярис-Адыгея» зыфи­Iорэр ары гъэмэфэ еджапIэм кIэщакIо фэхъугъэхэр.

Биологиер ыкIи химиер игъэ­кIотыгъэу зэрагъэшIэныр, теоретическэ ыкIи практическэ шIэныгъэхэр кIэлэеджакIохэм яIэнхэр ары зэхэщакIохэм пшъэ­рылъ шъхьаIэу зыфагъэуцужьырэр. Купым хэтхэу зыныбжь имы­къугъэхэр Iоф ашIэным фагъасэх, биологие ыкIи химие шIэныгъэхэм нахь апэблагъэ ашIых.
Мэфэ 21-м къыкIоцI Адыгеим, Москва, Санкт-Петербург, Мос­ковскэ, Тульскэ, Липецкэ, Пензэ, Псковскэ, Ростов, Самарскэ, Тюмень ыкIи Челябинскэ шъо­лъырхэм, Татарстан Республи­кэм ыкIи Ставропольскэ краим къарыкIыгъэхэм яшIэныгъэхэм ахагъэхъуагъ.
Гъэсэныгъэ программэм къы­дыхэлъытагъэу мафэ къэс лекциехэр, семинархэр, практи­ческэ IофшIэнхэр афызэхащэх. Нэрылъэгъу IэпыIэгъухэр къыз­фагъэфедэхэзэ ушэтынхэр ашIы­гъэх ыкIи шъолъыр зэфэшъхьаф­хэм къарыкIыгъэ кIэлэегъэджэ пэрытхэм хэушъхьафыкIыгъэ зэдэгущыIэгъухэр адыряIагъэх. Ащ нэмыкIэу, интеллектуальнэ джэгукIэхэр, творческэ зэнэ­къокъухэр, гухэлъ зэфэшъхьаф­хэмкIэ пчыхьэ клубыр, мас­тер-классхэр ыкIи спорт зэнэ­къо­къухэр афызэхащагъэх.
— Мы илъэсым анахьэу прак­тическэ Iофтхьабзэхэм тынаIэ атедгъэтыгъ, чIыпIэу лагерыр зыдэщытымкIэ ар гупсэфы, мэ­зым хэт псыкъефэхыпIэхэм ре­нэу кIэлэеджакIохэр тщагъэх, зекIо зэфэшъхьафхэр афызэ­хэтщагъэх. Тызэдиштэжьэу, зы унагъом фэдэу тимафэхэр дгъэ­кIуагъэх. Мафэ къэс унэмкIэ гъэцэкIэжьынхэр ашIыгъэх. Зы­дэщыIэхэ чIыпIэ дахэм гухахъо хагъуатэзэ еджэнымрэ зыгъэ­псэфыгъомрэ зэгъусэхэу яуахътэ агъэкIуагъ, — еIо тигущы­Iэгъу.
Данэ къызэриIуагъэмкIэ, шIэ­ныгъэ языгъэгъотыхэрэр кIэлэ­егъэджэ пэрытых. Ахэр Моск-
ва къэралыгъо университетэу М. В. Ломоносовым ыцIэ зы­хьырэм къикIыгъэх, республикэ естественнэ-хьисап еджапIэм, Адыгэ къэралыгъо университетым, гъэсэныгъэ гупчэу «Полярис-Адыгеям» Iоф ащашIэ. Джащ фэдэу илъэс зэкIэлъыкIохэм Урысые олимпиадэхэм текIоныгъэ ыкIи хагъэунэфыкIырэ чIыпIэ къыщыдэзыхыгъэхэр къырагъэблэгъагъэхэу яшIэныгъэхэмкIэ кIэлэеджакIохэм адэгуащэх. Ежь Мамый Данэ Москва къэралыгъо университетым биологиемкIэ ифакультет ибакалавриат ыкIи магистратурэр къыу­хыгъ, аспирантурэм чIэхьажьы­нэу зегъэхьазыры. БиологиемкIэ кIэлэеджакIохэм апае Уры­сые олимпиадэм ижюри хэт, олимпиадэм хэхьэрэ Iоф­шIэнхэр зэхегъэуцох.

ДЕЛЭКЪО Анет.