Къэбэртэе-Бэлъкъарым инароднэ сурэтышIэу Анатолий Жиловым ихэушъхьафыкIыгъэ къэгъэлъэгъон КъокIыпIэм щыпсэурэ лъэпкъхэм яискусствэкIэ Къэралыгъо музеим и Къутамэу Мыекъуапэ щыIэм къыщызэIуахыгъ.

Къэбэртэе-Бэлъкъар Республикэм культурэмкIэ и Министерствэрэ «Урысыем исурэтышIхэм я Союз» икъутамэу КъБР-м щыIэмрэ Iофтхьабзэм кIэщакIо фэхъугъэх. Живописым ыкIи графикэм илъ IофшIэгъэ 76-рэ къэгъэлъэгъоным хэхьагъ.
Музеим щыкIогъэ зэхахьэр АР-м культурэмкIэ иминистрэу Аулъэ Юрэ пэублэ гущыIэкIэ къызэIуихыгъ. СурэтышIым щыIэныгъэм илъэныкъуабэ къы­зэлъиубытызэ, искусствэм ыбзэкIэ сурэтхэм акупкI къызэрэригъэлъэгъукIырэр хигъэунэфыкIыгъ. Анатолий Жиловым исурэтхэр зэрэлъэгъупхъэхэр, зэрэзэфэшъхьафхэр, шIыкIэ-екIолIэкIэ гъэшIэгъонхэр зэрэIэкIэлъыхэр кIигъэ-­
тхъыгъ, мэфэкI къэгъэлъэгъоным къе­кIолIагъэхэм гухахъо хагъотэнэу къа­фэлъэIуагъ.
Музеим и Къутамэ ипащэу ШъэуапцIэкъо Аминэт, АР-м исурэтышIхэм я Союз итхьаматэу Елена Абакумовам, АР-м изаслуженнэ сурэтышIэу Гъу­кIэ Замудин зэIукIэм къыщыгущыIагъэх.
ГукъэкI гъэшIэгъонхэр IэпэIасэм ыгъэфедэзэ, IэшIэгъабэ ыIапэ къычIэ­кIыгъ. Адыгэ лъэпкъым ишэн-хабзэхэр къизыIотыкIырэ Iэпэщысэхэр ямышIыкIэу ыгъэпсыгъэх. Урысыем исурэтышIхэм я Союз ыгъэхьазырырэ Iофтхьабзэхэм, IэкIыб къэралыгъом щыкIорэ проектхэм Анатолий Жиловыр чанэу ахэлажьэ.
СурэтышIым жанрэ зэфэшъхьафхэмкIэ Iоф ешIэ: станковэ ыкIи монументальнэ живописымкIэ, тхылъ графикэмкIэ, ащ нэмыкIэу театральнэ ыкIи телевизионнэ къэгъэлъэгъонхэмкIэ сценэм щагъэфедэрэ пкъыгъо зэфэшъхьафхэм ягъэхьазырын хэлажьэ.
Илъэс 20-м ехъурэ егъэджэн Iофыр ыгъэцэкIагъ, изобразительнэ искусствэмкIэ лекциехэм къяджагъ. Икъэлэмыпэ къычIэкIырэ IэшIагъэхэмкIэ сурэтышIым итворчествэ зикIасэхэр егъэгушIох. Ахэр искусствэ лъагэм диштэхэу зэрэщытхэм фэшI щыIэныгъэм чIыпIэ хэхыгъэ щаубытыгъ.
Анатолий Жиловым изобразительнэ искусствэм фэгъэхьыгъэ тхыгъэхэр гъэ­зет ыкIи журнал зэфэшъхьафхэм къащыхиутыгъ. Адыгэ лъэпкъым икультурэ ыкIи итарихъ куоу зэригъэшIагъ. ИцIыкIугъом къыщыублагъэу адыгэ лъэпкъым ифэмэ-бжьымэ кIэтэу къэхъугъэ сурэтышIым, лъэпкъ нэшанэхэр къызэбэ­кIырэ IэшIэгъабэ къыдэхъугъ.
СурэтышIым ыпхъоу Марьянэ ыкIи ыкъоу Къантемыр Налщык къикIыхи къэгъэлъэгъоным ягуапэу хэлэжьагъэх. Ахэр ятэ итворческэ гъогу рыкIуагъэх, сурэтшIыным идунай хьалэмэт хэщагъэх.
Iофтхьабзэм Адыгэ Республикэм ишIэныгъэлэжьхэм ащыщхэр, сурэтышIхэр, лъэпкъ интеллигенцием инахьыжъ гъэшIуагъэхэр, АР-м культурэмкIэ и Министерствэ илIыкIохэр, искусствэр зикIасэхэр хэлэжьагъэх. МэфэкI зэхахьэр зэгъэфагъэу, узIэпищэу, уигъэдаIоу гъэпсыгъагъэ.
Iофтхьабзэм икъызэIухын ыуж хьакIэхэр IофшIагъэхэм яплъыгъэх. Къэ­гъэлъэгъоныр шышъхьэIум и 25-м нэс кIощт.
Лъэпшъыкъо Фатим.