Спортым имэфэкIрэ псауныгъэр гъэпытэгъэнымрэ ямафэ Адыгеим щыпсэурэ нэбгырэ мин пчъагъэ зэрапхыгъ. Физкультурникым и Мафэ фэгъэхьыгъэ Iофтхьэбзэ зэфэшъхьафхэр Мыекъуапэ, республикэм ипсэупIэхэм ащыкIуагъэх.

Теннис инымкIэ Iофтхьабзэу зэхащагъэм IэпэIэсэныгъэшхо зыхэлъ спортсменхэм адакIоу, езгъэжьэгъакIэхэми ­зыщаушэтыгъ. Шахматхэр зыгу рихьыхэрэри зэнэкъокъугъэх. Физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэр мы мафэм анахь шъхьэIагъ. Ащ хэлажьэ зышIоигъохэр аныбжь елъытыгъэу гощыгъагъэх, яфизическэ ухьазырыныгъэ аушэтыгъ, шапхъэхэр агъэцэкIагъэх. Ахэр къызэдэчъагъэх, пкIагъэх, ­шъхьадж ежь иамал елъытыгъэу, зыфэе спорт лъэныкъор къыхихын ылъэкIыгъ.
Теннис цIыкIумкIэ мэфэкI зэнэкъокъоу Апшеронскэ районым икъутырэу Николаенкэм щыкIуагъэм Мыекъуапэ илIыкIохэр хэлэжьагъэх. Апшеронскэ, Шытхьалэ, Хъыдыжъ, Санкт-Петербург къарыкIыгъэ спортсмен 50 фэдиз зэнэкъокъугъэх. Аныбжь елъытыгъэу ахэр купищэу гощыгъагъэх. Республикэм икъэлэ шъхьаIэ къэзыгъэлъэгъуагъэхэм медали 5 къахьыгъ. Артем Вариводинымрэ Бзаго Даринэрэ текIоныгъэр къыдахыгъ. Дмитрий Работяга ятIонэрэ чIыпIэр къыфагъэшъошагъ. Бзаго Дамиррэ София Рычковамрэ джэрз медальхэмкIэ къыхагъэщыгъэх. Адыгеим щыщ нэбгыри 8 турнирым хэлэжьагъ.

Мы мафэм тибоксерхэми тагъэгушIуагъ. Ядзэ пшъэрылъхэр агъэцакIэзэ зидунай зыхъожьыгъэхэ, хэушъхьафыкIыгъэ отрядым хэтыгъэ Тимур Масаловым ыкIи я 15-рэ хэушъхьафыкIыгъэ отрядэу «Вятич» зыфиIорэм икъулыкъушIэхэм яшIэжь фэгъэхьыгъэ зэнэкъокъоу Ермэлхьаблэ щыкIуа­гъэм ахэр хэлэжьагъэх. Боксым илъэныкъохэу «ММА», «тайскэ» ыкIи «класcическэ» зыфиIохэрэм къадыхэлъытагъэу зэIукIэгъу 15 рагъэкIокIыгъ. Адыгеим илIыкIохэу Ярослав Никитинымрэ Валерий Назриевымрэ текIоныгъэр къыдахыгъ.
Ау физкультурникым и Мафэ зэнэкъокъу закъоп, псауныгъэр гъэпытэгъэным ар фэIорышIэ. МэфэкIым къыдыхэлъытагъэу мастер-классхэр, лекциехэр, нэмыкI Iофтхьабзэхэр рагъэ­кIокIыгъэх, ахэм цIыфыбэ ахэлэжьагъ.