Iофтхьабзэр рагъэжьагъ
Лъэс зекIонымкIэ Iофтхьабзэу «Физкульт-Ура!» зыфиIорэр рагъэжьагъ. Мыщ хэлажьэхэрэм мэфиблым лъэбэкъу мини 100 къакIун фае.
Марафоным нэбгырэ 251-рэ хэлажьэ, ахэм ащыщэу 180-р – бзылъфыгъэх. Республикэм икъэлэ шъхьаIэ имызакъоу, Адыгеим ичIыпIэ зэфэшъхьафхэм, Саратовскэ хэкум, Краснодар ыкIи Омскэ ялIыкIохэм заушэты. ШышъхьэIум и 18-м нэс ар кIонэу агъэнафэ.
Iофтхьабзэм ишIуагъэкIэ цIыфхэм япсауныгъэ агъэпытэ, нэIуасэ зэфэхъух. Марафоным хэлажьэхэрэм щысэ атырахызэ Адыгеим щыпсэухэрэр спортым пыщагъэ хъунхэм, япсауныгъэ лъыплъэнхэм зэхэщакIохэр щэгугъых.
Зызыушэтыгъэхэм къызэрэхагъэщырэмкIэ, Iофтхьабзэм ишIуагъэкIэ жьы къабзэм нахьыбэрэ хэтыхэ хъугъэ, якIуачIэ хэхъуагъ. Лъэбэкъу мини 100 къэзыкIугъэхэм, шапхъэхэр зыгъэцэкIагъэхэм Мыекъуапэ физическэ культурэмкIэ ыкIи спортымкIэ и Комитет идипломхэр афагъэшъошэщтых.