Республикэм и Теуцожь район иавтомобиль гъогоу «ПчыхьэлIыкъуай – Хьалъэкъуай – Адыгэкъал» зыфиIорэм игъэкIэжьын макIо. АщкIэ зишIуагъэ къэкIуагъэр лъэпкъ проектэу «ЩыIэныгъэм пае инфраструктурэр» зыфиIорэр ары.

Мы илъэсым лъэпкъ проектымкIэ Теуцожь районым щагъэцэкIэжьырэ ятIонэрэ гъогу Iахьэу ар хъугъэ. Ащ ыпэкIэ километрэ 1,2-рэ хъурэ автомобиль гъогоу «Пэнэжьыкъуай – Город­скоир – Гъобэкъуай» зыфиIорэр шапхъэхэм адиштэу ашIыгъагъ.
Подряднэ организацием хэтхэм километри 3 зикIыхьэгъэ гъогур фрезеровкэ ашIыгъ, ыкIыIу зэрагъэфэжьыгъ. Джы къэнагъэр гъогубгъухэм ягъэпытэнрэ гъогухэм ягъэтхъыхьанрэ.
IофшIэнхэм сомэ миллион 54-рэ фэдиз апэIухьащт.
«Лъэпкъ проектэу «ЩыIэныгъэм пае инфраструктурэр» зыфиIорэм епхыгъэ IофшIэнхэр дэгъоу гъэцэкIагъэ хъунхэм ренэу тылъэплъэ. ГъогушIхэм джырэ уахътэм диштэрэ технологиехэр агъэфедэх. ГущыIэм пае, «битумнэ полимернэ лентэкIэ» заджэхэрэр. Гъогум тыралъхьэрэр нахь пытэ хъунымкIэ ащ ишIуагъэ къэкIо, шынэгъакIэм гъогур щеухъумэ. Ащ нэмыкIэу химическэ веществохэми зэрар къырамыхынымкIи ишIуагъэ къэкIо. Сыдэу щытми, гъогур шIэхэу зэщымыкъонымкIэ ишIогъэшхо къэкIо», — къыIуагъ автомобиль гъогухэм ягъэфедэнкIэ ыкIи якъэухъу­мэнкIэ «Адыгеяавтодорым» иотдел ипащэу Дмитрий Бороненкэм.
Шъугу къэтэгъэкIыжьы: мы илъэсым шъолъыр мэхьанэ зиIэ гъогу Iахь 25-рэ агъэцэкIэжьыщт, ахэр зэхэубытагъэу километрэ 70,1-рэ мэхъу.