Адыгэ Республикэм щыпсэухэу лъытэныгъэ зыфэтшIыхэрэр!
Физкультурникым и Мафэ фэшI тышъуфэгушIо!

Спортыр шIу зылъэгъухэрэм, щыIэкIэ-псэукIэ тэрэзым рыгъуазэхэрэм апай мы мэфэкI шIагъор. Зипсауныгъэ фэгумэкIыхэрэр, зипкъышъол зыпсыхьэхэрэр, зицыхьэ зытелъыжьхэр ащ зэрепхых.
Къэралыгъом зэрихьэрэ Iофтхьабзэхэу спортым цIыфхэр нахьыбэу хэщэгъэнхэм, ахэм япсауныгъэ гъэпытэгъэным япхыгъэхэм шIуагъэу къахьырэр нэрылъэгъу. СпортымкIэ инфраструктурэм изытет нахьышIу шIыгъэным тегъэпсыхьагъэу бюджетым ахъщэшхо къыхагъэкIы.
Адыгеим спортымкIэ гъэхъэгъэшхохэр зэришIыгъэм къегъэлъагъо республикэм икультурнэ кIэн ифэмэ-бжьымэ лъэныкъуабэмэ зэратырихьэрэр. Тиспортсмен цIэрыIохэр, титренерхэр зэрэдунаеу щызэлъашIэх.
Физкультурэмрэ спортымрэ афэлэжьэрэ пстэуми тызэрафэразэр непэ къатIомэ тшIоигъу. НыбжьыкIэхэмкIэ ахэр щысэшIух. Анахьэу етIани тызфэразэхэр спортым иветеранхэу лIэуж пчъагъэ зыгъэсагъэхэр ары. Ахэм ягъэхъагъэхэр IэпэIэсэныгъэмкIэ, гуетыныгъэмкIэ щысэтехыпIэу щытыщтых.
Тиспортсменхэм ыкIи республикэм щыпсэухэрэм тыгу къыддеIэу тафэлъаIо псауныгъэ пытэ, щыIэкIэшIу, гуетыныгъэ яIэнэу, Адыгеимрэ Урысыемрэ спортымкIэ гъэхъагъэу яIэхэм ахагъэхъонэу!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет - Хасэм и Тхьаматэу Владимир Нарожнэр