Джащ фэдэ гупшысэ уегъэшIы шъоущыгъум пкъы­шъолым зэрарэу рихын ылъэкIырэм зызыщыбгъэгъуазэкIэ.

Кардиологэу Ольга Бокерия и Телеграм-канал мы гъомылапхъэм фэгъэхьыгъэу къыщитхырэм къызэрэщиIорэмкIэ, «псауныгъэм епхыгъэ гумэкIыгъуабэм шъоущыгъум уафищэн ылъэкIыщт, ана­хьэу гу-лъынтфэ узхэм алъэныкъокIэ: лъыр лъынтфэхэм арыпцIыхьаныр (тромбоз), лъыдэкIуаер, нэмыкIхэри.
Мы узхэр е ащыщ уиIэ хъуным ищынагъо нахь макIэ пшIыным фэшI сыд фэдэрэ гъомылапхъэу шъоущыгъур бэу зыхэлъхэм (десертхэм, псы IэшIу зэфэшъхьафхэм) ягъэфедэн къыщыбгъэкIэн фаеу елъытэ Ольга Бокерия. Ахэм ахэхьэх компотхэу шъоущыгъукIэ «зэгугъугъэхэр», пхъэшъхьэ-мышъхьэхэм къакIэфыгъэ псэу тхылъыпIэ къэмланхэм арытхэр, «энергетики» зыфаIохэрэр, газ зыхэт псы IэшIухэр.
Кардиологым къызэрэхигъэщыгъэмкIэ, «шъоущыгъум ыкIуачIэ нахь «закъыщызэIуехы», нахь ащызэхэошIэ псы IэшIу­хэм». Ащ зэрилъытэрэмкIэ, мы зигугъу къэтшIыгъэ псы IэшIу зэфэшъхьафхэм ачIыпIэ ибгъэхьанхэ фае псы къызэрыкIор, щай е кофе мыIэшIухэр, ахэр пкъышъолымкIэ бэкIэ нахь федэх.
«Угу изытет, уипсауныгъэ нахьышIу пшIынхэ плъэкIыщт пшхырэм, узашъорэм якъыхэхын нахь тэрэзэу укъекIуалIэмэ», — еIо специалистым.
Шъоущыгъур бэу зыхэлъ гъомылап­хъэхэр бгъэфедэхэу уесагъэ зыхъукIэ, ахэм уалъымыIэбэныр, IэкIыб псынкIэу пшIынхэр IэшIэхэп. Ольга Бокерия зэрилъытэрэмкIэ, «диетэ зэфэ­шъхьафхэм уатесэу пкъышъолым къин ебгъэлъэгъуныри, ар зэщыбгъэкъоныри ищыкIагъэп, тIэкIу-тIэкIоу уишхакIэ зэ­блэпхъун, мэкIэ-макIэу ащ фэдэ гъомылапхъэхэр IэкIыб пшIынхэ фае». Ащ къызэрэхигъэщыгъэмкIэ, «цельные» зы­фаIорэ гъомылапхъэхэр нахьыбэрэ бгъэфедэнхэ фае: пхъэшъхьэ-мышъхьэ­хэр, хэтэрыкI зэфэшъхьафхэр, былымылыр, дэшхор, семчыкыр.
Пкъышъолыр шъоущыгъум нахь «кIэрыкIынымкIэ» IэпыIэгъушIу хъунхэу врачым ылъытэрэ гъомылапхъэхэм ащыщых йогурт зэфэшъхьафхэр, къуаер, щэр.