Абхъазым теннис цIыкIумкIэ и Федерацие изэхэщакIоу Омар Кварчия ишIэжь фэгъэхьыгъэ я XVII-рэ дунэе зэнэкъокъум Мые­къуапэ щыщ спортсменым гъэхъэ­гъэшIу щишIыгъ, текIоныгъэ къы­щыдихыгъ.

Урысыем ыкIи Къыблэ Осетием яспортсменхэр ащ хэлэжьагъэх.
Мыекъуапэ испорт еджапIэу С.М. Джэнчатэм ыцIэ зыхьырэм зыщызыгъэсэрэ Адам Матюшиным апэрэ чIыпIэр къыхьыгъ. Зыныбжь илъэс 14-м емыхъугъэхэм якуп ащ зыщиушэтыгъ. ­Илъэс 11 зыныбжь кIалэм итренерыр Бзаго Рустам.
Сыхъум щыкIогъэ турнирым титеннисист зэIу­кIэгъуитф щыриIагъ, зэкIэми текIоныгъэр къащыдихыгъ. Финалыр Абхъазым илIыкIо къы­шIуихьыгъ. Адам ышнахьыкIэу Эльдар я 4-рэ чIыпIэр къыфагъэшъошагъ. Ар ящэнэрэ чIыпIэм икъыдэхын фэбанэзэ Волгоград щыщ Даниэл Данельян IукIагъ, ау 2:3-у ешIэгъур шIуахьыгъ.