Еджэгъу илъэсыкIэм ехъулIэу Адыгеим икъоджэ еджапIэхэм кIэлэегъэджи 8 агъэкIощт.

Программэу «Къоджэ кIэлэегъадж» зыфиIорэм къыхиубытэу ащ хэлэжьэрэ нэбгыри 8-мэ Iоныгъом и 1-м респуб­ликэм икъоджэ псэупIэхэм IофшIэныр ащаублэщт. Ащ ыпэкIэ Адыгеим икъоджэ еджапIэхэм кIэлэегъэджэ 49-рэ къачIэуцуагъ.
ГущыIэм пае, Урысые проектэу «Къо­джэ кIэлэегъадж» зыфиIорэм хэлэжьэрэ Арина Саенкэм ХъымыщкIэй апэ Iоф щишIагъ. 2023-рэ илъэсым ар чIыпIакIэм щылэжьэнэу кIуагъэ – Мыекъопэ районым гъэсэныгъэмкIэ игупчэу N 3-м, ар псэупIэу Первомайскэм дэт.
— Шъолъырым гъэсэныгъэм ылъэныкъокIэ хэхъоныгъэ егъэшIыгъэным сиIахь хэслъхьанымкIэ «Къоджэ кIэлэегъадж» зыфиIорэ проектым сызэрэхэлажьэрэм ишIуагъэ къэкIуагъ. КIэлэцIыкIухэм Iоф зэрадасшIэрэ мафэ къэс кIэ горэ къызэрэзыдихьырэм ыкIи мэхьанэшхо зэриIэм сицыхьэ телъ. Сэ сипшъэрылъыр езгъэджэнхэ закъор арэп, гу язгъэшIын, сабый пэпчъ амалэу иIэм икъызэIухын, — къыIуагъ Арина Саенкэм.
Шъугу къэдгъэкIыжьын, федеральнэ программэу «Къоджэ кIэлэегъадж» зыфиIорэр кIэлэегъаджэхэр къоджэ псэупIэхэмрэ къэлэ цIыкIухэмрэ къящэ­лIэгъэнхэм тегъэпсыхьагъ. 2025-рэ илъэсым щылэ мазэм и 1-м къыщыублагъэу ­лъэпкъ проектэу «НыбжьыкIэхэмрэ кIэлэцIыкIухэмрэ» зыцIэм ифедеральнэ проектэу «КIэлэегъа­джэхэмрэ гъэсакIохэмрэ» ар хэхьэ. КIэлэегъэджэ минхэр ащ хэлажьэх. Президентэу Владимир Путиным иунашъокIэ программэр 2030-рэ илъэсым нэс джыри Iоф ышIэнэу лъагъэкIотагъ.