2025-рэ илъэсым шышъхьэIум и 5-м къыщегъэжьагъэу и 28-м нэс къэралыгъо мэз фондым къыхиубытэрэ чIыгухэм атет мэзхэм ахахьэхэрэм япчъагъэ пIэлъэ гъэнэфагъэкIэ къыщагъэкIэнэу рахъухьагъ.

Пстэуми апэу ар зыфэгъэхьыгъэр Красногвардейскэ, Мыекъопэ, Первомайскэ ыкIи Гъозэрыплъэ мэзхэр ары. Адыгэ Республикэм мэзхэмкIэ и ГъэIорышIапIэ унашъоу ышIыгъэм ар къыпкъы­рэкIы.
— Пстэуми апэу ар зэпхыгъэр нахь фабэ зэрэхъурэр, Адыгэ Республикэм игупчэ ыкIи итемыр лъэныкъохэм машIом закъыщиштэным ищынагъо зэрэщыIэр, шынэгъакIэр зэрэмакIэр, уцхэр зэрэгъу­хэрэр ары, — къаIуагъ мы Iофым фэгъэзагъэхэм.
ГущыIэм пае, къэралыгъо мэз фондым къыхиубытэрэ чIыгухэм цIыфхэр жъу­гъэу зыхэлэжьэрэ культурэ Iофтхьабзэхэр ащызэрахьэхэ хъущтэп, зэкIэми зэдагъэ­федэрэ гъогухэу мэзхэм апхырыкIыхэрэм ыкIи мэзхэм якъэухъумэн фытегъэ­псыхьагъэу щытхэм анэмыкIхэм зэрарыкIохэрэм бэкIэ къащагъэкIэн фае. Мыхэм къахиубытэхэрэп мэзым епхыгъэ IофшIэнхэр зыгъэцакIэхэрэр. МашIо ашIы, хэкIыр агъэсты хъущтэп, мэз фондым ичIыгухэм ыкIи ащ къыпэIулъ чIыпIэхэм машIом закъыщиштэным ищынагъо зэрэщыIэр икъоу зэкIэми къыдалъытэн фае.