ЗэлъашIэрэ шIэныгъэлэжьэу, профессорэу, филологие шIэныгъэхэмкIэ докторэу, Урысые Федерациемрэ Адыгэ Респуб­ликэмрэ шIэныгъэмкIэ язаслуженнэ IофышIэшхоу Мамый Руслъан дунаим ехыжьыгъ.
Руслъан Хьылым ыкъор бзэшIэныгъэлэжьыгъ, ащ научнэ статья, научнэ тхылъ ыкIи монографие 400-м ехъу къыдигъэкIыгъ. Ащ дакIоу ар литературовед, адыгэ прозэм, анахьэу етIани романым, иушэтакIоу щытыгъ. Монографие, статья 100 пчъагъэ а Iофым фэгъэхьыгъэу ытхыгъ, Темыр Кавказым ипэрыт тхылъ тедзапIэхэм ахэр къащыдагъэкIыгъэх. Ащ нэфэшъхьафэу томищ хъурэ тхылъэу «Адыгэ культурэм итарихъ» зыфиIорэм иавторхэм, иредакторхэм ащыщыгъ. Я 11-рэ классым исхэм апае «Адыгэ литературэр» зыфиIорэ зэреджэщтхэ тхылъыр гъусэхэр иIэу къыдигъэкIыгъ, я 11-рэ классым щезыгъэджэхэрэ кIэлэегъаджэхэм апае IахьитIоу зэтеутыгъэ тхылъ IэпыIэгъоу «Адыгэ литературэр» ытхыгъ.
Илъэс 20-м ехъурэ Руслъан Хьылым ыкъор гуманитар ушэтынхэмкIэ Адыгэ республикэ институтэу КIэрэщэ Тембот ыцIэкIэ щытым ипащэ наукэмкIэ игуа­дзэу щытыгъ, 2025-рэ илъэсым мэкъуо­гъум нэс мы институтым литерату­рэмкIэ иотдел инаучнэ IофышIэ шъхьэ­Iагъ.
Научнэ-зэхэщэн IофшIэнымрэ егъэ­джэн Iофымрэ чанэу ащ зэдигъэцакIэщтыгъэх. Адыгэ къэралыгъо университетым литературэмрэ журналистикэмрэкIэ икафедрэ ар ипрофес­сорыгъ. Илъэсыбэхэм Мамый Руслъан шIэныгъэхэмкIэ Дунэе Адыгэ Академием ипрезидиум хэтыгъ, а академием иученэ секретарь шъхьаIэ ­игодзагъ. Темыр Кавказым иинститутхэу ащ фэдэ IофшIэнхэр зыгъэцакIэхэрэм зэпхыныгъэ адыряIэным, Москва иака­демическэ институтхэм гъусэныгъэ адэшIыгъэным лъэшэу ынаIэ ащ тыригъэтыщтыгъ. Кавказымрэ Урысыемрэ яшIэныгъэлэжьхэм Мамый Руслъан къылэжьыгъэ шъыпкъэу шъхьэкIафэ къыфашIыщтыгъ.
Республикэм иапшъэрэ тынэу медалэу «Адыгеим и Щытхъузехьэр», орденэу «Щытхъум итамыгъ», «Честь и слава Абхазии» зыфиIорэ бгъэхалъхьэр, къэралыгъо, научнэ-общественнэ къулыкъу зэфэшъхьафхэм я Щытхъу тхылъхэр къылэжьыгъэх. Мамый Руслъан шIэныгъэм ылъэныкъокIэ Адыгэ Республикэм и Къэралыгъо шIухьафтын къыфагъэшъошэгъагъ, Урысыем итха­кIохэм я Союз, Адыгэ Республикэм инахьыжъхэм яобщественнэ движе­ниеу «Адыгэ Хасэм» и Совет ахэтыгъ.

Мамый Руслъан идунай зэрихъожьыгъэмкIэ гуманитар ушэтынхэмкIэ АР-м иинститут иIофышIэхэр ащ иунагъорэ иIахьылхэмрэ афэтхьаусыхэх.

ЗэлъашIэрэ шIэныгъэлэжьэу, зи­тхыгъэхэр «Адыгэ макъэм» бэрэ къизыгъахьэщтыгъэу, ныбджэгъушIоу гъэзетым иIэгъэ Мамый Руслъан идунай зэрихъожьыгъэр тыгу къеуагъ. Руслъан иунагъо, игупсэхэм тафэ­тхьаусыхэ, дунаим ехыжьыгъэм джэнэт лъапIэр Тхьэм къыритынэу тыфэ­лъаIо.
Республикэ гъэзетэу
«Адыгэ макъэм» иIофышIэхэр.