Адыгеим и ЛIышъхьэу КъумпIыл Мурат культурнэ композицием икъызэIухын хэлэжьагъ. ПсэупIакIэу «Гагарина 1» зыфиIорэм, къэлэ паркым иехыпIэ дэжь ар щагъэуцугъ.

Iофтхьабзэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м иминистрэхэм я Кабинет хэтхэр, Мыекъуапэ имэрэу Геннадий Митрофановыр, скульптурэм ишIын фэгъэзэгъэгъэ компанием ипащэу Бырсыр Анзор, Урысыем культурэмкIэ изаслуженнэ IофышIэу, Адыгеим изаслуженнэ сурэтышIэу, скульптурэм иавторэу Бырсыр Абдулахь. Бырсыр Абдулахь къызэгущыIэм къызэрэхигъэщыгъэмкIэ, лъэпкъ шъуашэ зыщыгъ цIыфэу бзыур шъхьафитэу быбыным пае зытIупщырэм къегъэлъагъо адыгэ лъэп­къыр къэзыуцухьэрэ дунаим щыщыным зэрэкIэхъопсырэр. Скульптурэр джэрзым хэшIыкIыгъ, карельскэ гранитым ар тет.
Адыгеим и ЛIышъхьэ IофшIэгъакIэм пае Бырсыр Абдулахь зэрэфэразэр къыIуагъ, гупшысэ куу ащ зэрэхэлъыр, лъэпкъ гупсэм икультурэ лъагэу зэриIэтырэр, адыгэхэм яакъылышIуагъэрэ ягушъхьэлэжь баиныгъэрэ къызэригъэлъагъорэр къыхигъэщыгъ.

«Лъэпкъ культурэмрэ адыгэхэм ядунэееплъыкIэрэ янэшанэхэр скульптурэм къыхэщых. ТикIэн шIагъо къэухъумэгъэ­ным ыкIи къыткIэлъыкIощт лIэужхэм анэгъэсыжьыгъэным изы лъэбэкъоу ар хъущт», — къыхигъэщыгъ КъумпIыл Мурат.
Рэзэныгъэ гущыIэхэр проектым ­мылъку IэпыIэгъу езытыгъэ, компанием пэщэныгъэ дызезыхьэрэ Бырсыр Анзори фэгъэхьыгъэхэу ащ къыIуагъэх. ЦIыфхэр зычIэсыщтхэ унэхэм яшIын иIахьышхо ащ хешIыхьэ, арт-псэуалъэм ыкIи парк шъолъырым къыхиубытэрэ дэкIоепIакIэм ягъэпсын кIэщакIо фэхъу­гъэри ары. Мы компанием шIухьафтын фэдэу къалэм фишIыгъ: къэлэ паркым игектар 1,5-рэ фэдизмэ чъыг 70-рэ, кондэ 2000 фэдиз ащигъэтIысыгъ, автоматическэу псы тезыкIэщтыр зыхэт чIыгу квадрат метрэ мин 12 хъурэ газонри зэтыригъэпсыхьагъ.

«ТэркIэ а пстэуми мэхьанэшхо яI. Къалэр нахь дахэу ыкIи ущыпсэунымкIэ Iэрыфэгъоу ашIы, цIыфхэр зэрапхых, лъэпкъ зэфэшъхьафхэм къахэкIыгъэхэу Адыгеим щыпсэухэрэм яшэн-хабзэхэр гъэлъэпIэгъэнхэм ыкIи лъытэныгъэ зэфашIыным фегъасэх. ЦIыфхэр зыщызэIукIэщтхэ ыкIи зыщызэдэгущыIэщтхэ чIыпIэ гуIэтыпIэу мы скульптурэр орэхъу. Тикультурэ къэтыухъумэн зэрэфаем ащ нахь тыферэгъэчэф ыкIи ар ищыкIагъэу зэрэщытыр тщерэмыгъэгъупш. Проектым хэлэжьэгъэ пстэуми сафэраз! ТапэкIи тIэ зэкIэдзагъэу тикъалэрэ тиреспуб­ликэрэ нахь дэгъу, нахь дахэ зэрэхъущтхэм тыдэжъугъэлажь!», — къыIуагъ КъумпIыл Мурат.
Iофтхьабзэм икIэухым чIыпIакIэр зэкIэ къекIолIагъэхэм зэрагъэлъэгъугъ – скульп­турнэ композициемрэ ыкIи дэкIояпIэу къэлэ паркым икъехыпIэ джы зыгъэкIэракIэрэмрэ.