ИгъэкIотыгъэ гъэкIэжьын Iоф­тхьабзэхэр зыщызэрахьагъэхэ нэужым республикэ стадионым бэмышIэу къыщызэIуахыжьыгъэ чIыпIэхэу теннис зыщешIэхэрэм язытет зыфэдэ хъугъэр зэригъэлъэгъугъ Адыгеим и ЛIышъхьэу КъумпIыл Мурат. Респуб­ликэм испорт инфраструктурэ ихэхъоныгъэ къыдыхэлъытагъэу IофшIэнхэр ащ щагъэцэкIагъэх.

Республикэм и ЛIышъхьэ игъусагъэх АР-м иминистрэхэм я Кабинет и Тхьаматэу КIэрэщэ Анзаур, Мые­къуапэ имэрэу Геннадий Митрофановыр, АР-м физическэ культурэмкIэ ыкIи спортымкIэ и Комитет итхьаматэу Дэгужъые Мурат, программэу «ЛIыхъужъ­хэм яуахът» зыфиIорэм хэлэжьэрэ Сергей Ковалевыр, теннис гупчэу «Смэш» зыфиIорэм ипащэу Алый Али.
Адыгеим и ЛIышъхьэ агъэкIэжьыгъэ чIыпIэхэу квадрат метрэ 1800-рэ фэдиз хъухэрэр къыплъыхьагъэх. Теннис зыщешIэхэрэ чIыпIищмэ чIыгум тебзэу иIагъэр ащызэблахъугъ, къэзгъэнэфыщт­хэр Iуагъэуцуагъэх, теннисымкIэ къашъхьэпэщт Iэмэ-псымэхэр зэрагъэ­гъотыгъэх, а чIыпIэхэр къызэрэшIыхьагъэхэр нахь агъэкIэжьыгъ, чIыпIэу къапэIулъыри зэтырагъэпсыхьагъ. Джы спортсменхэмрэ ахэм еплъынхэр зикIасэхэмрэ джырэ шапхъэхэм адиштэрэ, Iэрыфэгъоу щыт амалхэр къызфагъэфедэнхэ алъэкIыщт.

Мы чIыпIэхэм тренировкэхэр ащаублэжьыгъэх. Адыгеим и ЛIышъхьэ ащ фэдэу зызщагъэсэрэ уахътэ горэм алъы­плъагъ. Теннис гупчэу «Смэш» зыфиIорэм испортсменхэу тренерэу Алый Анжеликэ пэщэныгъэ зыдызэрихьэхэрэм зызщагъэсэрэ лъэхъаным ар тефагъ. Апэрэ чIыпIэм зыщызгъасэщтыгъэхэр илъэси 6-м къыщегъэжьагъэу 9-м нэс зыныбжь кIэлэцIыкIухэр ары, ятIонэрэм – илъэс 15 зыныбжь пшъэшъэжъыехэр, ящэнэрэм – IэпэIэсэныгъэ ин зиIэ спорт­сменкэхэр. Нэужым ныбжьыкIэ шъхьэ­ихыгъэ я 12-рэ чемпионатэу «Адыгея Теннис Чемпионшип» зыфиIорэм икIэух зэдешIэгъу щыIагъ. АгъэкIэжьыгъэ теннис ешIапIэхэр къызэрэзэIуахыжьыгъэхэм елъытыгъэу апэрэ теннис Iэгоо цIыкIур ыдзынэу Адыгэ Республикэм и ЛIышъхьэ фигъэшъошагъ спортым иветеранэу, физическэ культурэмкIэ инструкторэу Александр Панайотиди.

КъумпIыл Мурат тренерхэми, спорсменхэми гущыIэгъу афэхъугъ. Респуб­ликэм спортым нахь зыщиушъомбгъунымкIэ шъолъырым ипащэ къызэрадеIэрэм, теннисым ихэхъоныгъэ ынаIэ къызэрэтыригъэтырэм апае зэрэфэразэхэр ахэм къаIуагъ. Адыгеим и ЛIышъхьэ къыхигъэщыгъ чIыпIакIэхэу зэтырагъэпсыхьагъэхэм зэнэкъокъухэр ащызэхэщэгъэнхэмкIэ, кIэлэцIыкIухэр нахьыбэу спортым хэщэгъэнхэм япхыгъэ, щыIэкIэ-псэукIэ тэрэзым нахь зиушъомбгъуным атегъэпсыхьэгъэ Iофтхьабзэхэм зягъэушъомбгъугъэнымкIэ яшIуагъэ къы­зэрэкIощтым ицыхьэ зэрэтелъыр.
Республикэм физическэ культурэмрэ спортымрэ нахь зыщягъэушъомбгъугъэным ипрограммэшхо изы Iахьэу щыт агъэкIэжьыгъэ теннис чIыпIэхэр къызэрэзэIуахыгъэхэр. Мы илъэсым къыщегъэжьагъэу теннис цIыкIум и Федерацие иIэпыIэгъу хэлъэу Мыекъуапэрэ Тэхъу­тэмыкъое районымрэ шъолъыр гупчитIу къащызэIуахыщт. Ахэм кIэлэцIыкIухэми, ныбжь зиIэхэми защагъэсэн, спортсмен IэпэIасэхэми язэнэкъокъухэр ащызэхащэнхэ алъэкIыщт.
«Теннисыр зисэнэхьатхэм ямызакъоу, республикэм щыпсэурэ цIыфхэу спортым пылъы зышIоигъохэмкIи мыщ фэдэ псэуа­лъэхэм мэхьанэшхо яIэу щыт. ТапэкIи спорт инфраструктурэм хэхъоныгъэ едгъэ­шIыщт, спорт лъэпкъхэу тиIэхэм зядгъэушъом­бгъущт нэбгырэ пэпчъ ­иамалхэр нахь дэгъоу къызэIуихынхэм ыкIи щыIэкIэ-псэукIэм нахь чанэу хэлэжьэным апае», — къыхигъэщыгъ КъумпIыл Мурат.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.