Адыгеим ичIыгулэжьхэм мэфэ ошIухэр къызфагъэфедэхэзэ бжыхьэсэ лэжьыгъэм иIожьын аухыгъ. ПстэумкIи гектар 107618-у яIагъэм тонн мин 579-рэ фэдиз къырахыгъ. Зы гектарым, гурытымкIэ лъытагъэу, центнер 59,7-рэ къытыгъ. ГъэрекIо елъытыгъэмэ, ар центнер 16,3-кIэ нахьыб.

Бжыхьасэхэм къарахыгъэмкIэ Джэджэ районым ичIыгулэжьхэр апэ хъугъэх, зы гектарым гурытымкIэ центнер 63,7-рэ къырахыгъ. Ахэм тIэкIу ауж къинагъ Кощхьэблэ районыр, гектар телъытэу центнер 60-рэ къырахыгъ.
Бжыхьэсэ хьэу республикэм щыха­лъхьэгъагъэр гектар 8380-рэ хъущтыгъ. Ащ изы гектар, гурытымкIэ лъытагъэу, центнер 51-рэ къырахыжьыгъ. Гурыт къэгъэлъэгъоным нахьыбэ къахьыжьыгъ Джэджэ, Теуцожь районхэм ячIыгулэжьхэм.
Коцыр гектар 88623-р хъущтыгъ, гурытымкIэ центнер 60,5-рэ къырахызэ, тонн мин 536-рэ къаугъоижьыгъ. Мыщ иIухыжьынкIэ пэрытныгъэ аIыгъ Джэджэ, Кощхьэблэ, Шэуджэн районхэм ячIыгулэжьхэм.
КъэIогъэн фае бжыхьасэу Iуахыжьыгъэхэм ащыщэу ауплъэкIугъэхэм япроцент 90-м гъомылапхъэ ахэпшIыкIын зэрэплъэкIыщтыр.
Рапс гектар 10433-р джащ фэдэу мэфэ заулэкIэ Iуахыжьыгъ. Ащ гурытымкIэ лъытагъэу центнер 28-рэ къытыгъ, тонн 29235-рэ къырахыгъ.
Тритикалеу Джэджэ, Мыекъопэ, Шэуджэн районхэм ащыхалъхьэгъагъэм иIухыжьыни ыкIэм фэкIуагъ. Гектари 182-рэ хъурэм гурытымкIэ центнер ­52-рэ къырахыгъ, къаугъоижьыгъэр тонн ­941-рэ мэхъу.
Бжыхьасэхэм яIухыжьын аухыгъэми, чIыгулэжьхэм яIофшIэн къэуцурэп. Къэ­кIорэ илъэсым фэлэжьэнхэу аублагъ, гектар 1490-рэ ажъуагъ, къэрсэбан гектар 6194-рэ агъэхьазырыгъ.
Гъэтхасэхэм яIухыжьыни чанэу зэшIуа­хы. Гъэтхэсэ хьэ гектар 280-м щыщэу 236-р Iуахыжьыгъ, ащ центнер 43,2-рэ къырахы. Зэнтхъ гектар 611-м щыщэу 354-р аIожьыгъ, гурытымкIэ центнер 33,1-рэ къеты, джэнч лъэпкъхэр зыщапхъыгъэгъэ гектар 2471,3-м центнер 30 гурытымкIэ къырахы. ХэтэрыкI гектар 169-м щыщэу 39-рэ аугъоижьыгъ, картоф гектар 59-м щыщэу 12-р Iуахыжьыгъ, ащ центнери 165-рэ къырахы.
ДЕЛЭКЪО Анет.