Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ иIофышIэхэмрэ хэгъэгу кIоцI IофхэмкIэ Министерствэм и ГъэIорышIапIэу наркотикхэр зэрагъэзекIорэм гъунэ лъызыфырэмрэ Гупчэ Азием щыщ хъулъфыгъищэу Адыгеимрэ Краснодар краимрэ наркотикхэр хэбзэнчъэу ащыIузыгъэкIы зышIоигъуагъэхэм ягъогупэ пабзыкIыгъ.

Мы нэбгырищыр зэ­къуахьи, ИнтернетымкIэ IуагъэкIынэу щытыгъэ наркотик лъэпкъ заулэ къызIэкIагъэхьагъ.
Илъэс 33-рэ, 27-рэ, 25-рэ зыныбжь бзэджашIэхэм наркотикхэр Кощ­хьэ­блэ районым щаIыгъыгъэх. ЧIыпIэ гъэнэфагъэ­хэм шъэфэу ачIалъхьэхэзэ ахэр зэрэIуагъэкIыщтхэм икъэбар хэбзэухъумакIохэм къазыIэкIахьэм, бзэджашIэхэр къаубытынхэу тыраубытагъ.
Хъулъфыгъэхэм яавтомобиль къызалъыхъум, зэкIоцIыщыхьэгъи 119-рэ къырагъотагъ. Адыгэ Рес­публикэм хэгъэгу кIоцI IофхэмкIэ и Министерствэ иэксперт-криминалистхэм зэрагъэунэфыгъэмкIэ, ме­тадон грамми 10-рэ эфед­рон грамм 21-рэ фэ­дизрэ ахэм къакъуа­хыгъ.
Урысыем и Уголовнэ кодекс ия 228.1-рэ статья ия 4-рэ Iахь ипунктэу
«г»-м диштэу Адыгэ Рес­публикэм хэгъэгу кIоцI IофхэмкIэ и Министерствэ иследственнэ гъэIорышIапIэ иследственнэ часть уголовнэ Iофыр къызэIуихыгъ. Урысыем и Уголовнэ-процессуальнэ кодекс ия 91-рэ статья диштэу хъулъфыгъэхэр изоляторым рагъэтIысхьагъэх, илъэс 20-м нэсэу ахэм хьапс атыралъхьан алъэкIыщт.
ХэбзэухъумэкIо къулыкъухэм яIофышIэхэм ахэр нэмыкI бзэджэшIагъэхэм ахэщэгъагъэхэмэ джы зэ­рагъашIэ.